Tun hnaia Mizoram Resource Mobilization Committee vice chairman Haukhuma Hauzel, IAS (Rtd) hova Taxation department leh Aizawl City Local Council Association (ACLCA) hruaitute thukhawm chuan, sawrkarin GST atanga chhiah tam zawk a lak theih dan tur sawi hovin, Aizawla dawrkai tam zawkin sawkara GST an pek theihna turin ACLCA nen thawh dun dan tur an rel a.
GST danah chuan, sumdawng kum khat hralh chhuah (annual turnover)-in cheng nuai 20 a tlin chuan GST registration a ti ngei tur a ni, tih a ni a. Tun dinhmunah hian, GST pe duh lo emaw chhan dang avanga GST Registration ti duh lo engemawzat awma rin a ni.
GST registration ti awm ngawih ngawih, mahse registration ti si lo hi Aizawl khawpuiah hian an tam niin tunhma deuh atang khan sawi a ni thin a. Hei hi taxation department lam pawhin an theih ang ang chuan an hrût kual ve viau niin a lang a; mahse, thawktu indaihlohna avang te pawh a ni ang a, an vil (cover) vek seng lovang tih a rin theih awm e.
India ram state hrang hrang tana GST Turnover Limit ruahman danah chuan, state dang tan cheng nuai 40 bituk a nih laiin, keini hmarchhak state pasarih (Assam tel lovin) leh Uttarakhand state tan cheng nuai 20 bituk a ni thung a.
A chhiarkawp zawngin: Kum khat chhunga sumdawng lakluh cheng nuai 20 hi thla tin anga chhut chuan cheng nuai 1.6 (20/12) ang a ni a; mahse, Dan chuan thla tin cheng nuai 1.75 angin a bituk thung.
Hetia han ngaih mai chuan, thla khata cheng nuai 1.75 lalut lo tan chuan, dawr luah man, chhungkaw ei bar leh khawsakna hrang hrang, tui bill, electric bill etc., naupang zirna senso, kohhran leh tualchhung khawntesep etc. zawng zawng hi a pek theih dawn loh a; chuvangin, sumdawnna kalpui reng tur chuan, thla khatah cheng nuai 1.75 aia tam hralh chhuah ngei ngei a ngai tihna a ni a. Chuti a nih chuan, GST-a inziak lut pha lo tur chu an tam vak dawn lo tihna a ni.
Tuna ACLCA nena thawh ho tumna hi a hlawhtlin chuan, GST chhung lut ngai lo tam takin an chhun luh phah ang a, chu chuan awmzia thui tak a nei dawn a, GST lak tihpun dan tur ruahmanna hi thil tha tak ni dawnin a lang.
GST lak tihpun….chhiarkawp
