Gujarat-ah al-Qaeda nena inzawm firfiak pali man

Gujarat-ah al-Qaeda nena inzawm firfiak pali man
Gujarat anti-terrorist squad (ATS) chuan al-Qaeda nena inzawmna nei, pawisa lem siam leh thehdarhnaa inhnamhnawih leh khawvel huap firfiak pawl thuchah thehdarhtu nia an hriat pali an man a. Pakhat hi state danga an man niin an sawi bawk.
Mohd Faiq, Mohd Fardeen, Sefullah Kureshi leh Zeeshan Ali te hian social media platform leh app rinhlelhawm tak tak hmangin al-Qaeda ngaihdante an thehdarh thin niin an sawi.
An hnuhma chhui zui a nih lohna turin auto-delete app an hmang thin bawk niin an sawi a. Thu zawh fiah mek an ni tih an sawi.
Gujarat ATS officer-te chuan firfiak pawl nen hian hun rei tak atang tawhin inzawmna an nei tawh niin an sawi a, social media platform hmangin al-Qaeda nen hian an inbepawp niin an sawi.
Firfiaka chetna thil an sawiho an hriat atangin ATS hian an chhui zui a. An inbiakna (chat) leh social media an enkawlte chu an en fiah zui mek.
“Social media hmangin an inbia a. Delhi-a cheng, Faiq-a hian Pakistani Instagram account neitu pakhat biain India-a firfiaka chetna tur an sawi thin a ni,” tiin Deputy Inspector General of Police (DIG), Gujarat ATS, Sunil Joshi-a chuan a sawi.
Ahmedabad khawpuia Fatehwadi venga Shaikh-a in an dapnaah ATS hian ngunhnam leh India-in May thlaa Pakistan laka Operation Sindoor a kalpui demna lam hawi AQIS thu ziak an hmu tih a sawi.
“Heng mi palite tum ber chu jihadist atan thalaite him tuma India-a mipui rorelna chu tharum hmanga tihbuai an tum a. Eng ang puihna nge an dawn leh eng ang ruahmanna nge an neih tih chu kan chhui mek zel a ni,” tiin Joshi-a chuan a sawi.
An Instagram-ah pawh firfiakna nena inkungkaih thil an tar lang nasa a, Sharia law leh chibing inlakna lam hawi, chi leh chi inhuatna ang chi an tar lang nasa niin IPS officer hian a sawi.
Indian pakhat, al-Qaeda zawma kum 2019-a Afghanistana thah tak, Asim Umar-a video pakhat pawh an zinga mi hian a Instagram-ah hian a dah niin a sawi bawk.
“An chet dan hian firfiaka chet tumnaa an phiar nasa tih a lang a, ralthuam lam an tilar a, India hi ram pakhat a nihna leh mipui rorelna ram nghet tak a nihna hi tihchhiat an duh tih a lang a ni,” tiin DIG hian a sawi.
al-Qaeda hi Osama bin Laden-a kaihruai thintu, Sheikh Abdullah Azzam-a’n a din, Afghanistan-a firfiakte puitu, Makhtab al-Khidamat atanga kal hrang a ni a. An pawl hian Africa, Asia, Europe leh North America-ah pawi lian tak tak an khawih tawh.
An indin atanga kum 1991 thleng khan al-Qaeda hi Afghanistan leh Pakistan-a Peshawar velah an awm ber thin a. Kum 1996 atanga 2001 thleng khan bin Laden-a’n Afghanistan atangin Taliban awpna hnuaiah a enkawl a ni.