Gujarat lei chimah mi 17 thi tawh, engineer pali hrem
Nilaini tuka Gujarat-a Vadodara district-a lei chima thi chu mi 17 an tling ta a, mi pathum chin hriat loh an la awm mek a, zawn hna thawh mek zel a la ni a. Engineer pali suspend an ni.
Mahisagar lui chunga kum 40-a upa lei hi Anand leh Vadodara district intlawh tawnna niin Gambhira khaw bul, Padra khaw hnaih takah Nilaini tuk dar 07:00 vel khan a chim a ni.
“Mi pathum chin hriat loh an la awm a, National Disaster Response Force (NDRF), State Disaster Response Force (SDRF) leh agency dang team 10 velin a zawn hna an la thawk mek zel a ni,” an ti.
Ruang 17 lak chhuah tawh niin hliam tuar mi pangate chu an dinhmun a tha a, damdawi in atang pawhin chhuahtir tawh an ni tih Vadodara Collector Anil Dhameliya chuan thuthar lakhawmtute hnenah a sawi.
Luia chirh chhah taka tla lirtheite pawh lak chhuah a ni nual tawh a, hetiang hmunah hian khawl tirh luh theih a nih loh avangin hna a hautak hle tih Dhameliya-a chuan a sawi.
Ningani khan Gujarat Chief Minister Bhupendra Patel-a chuan lei chim kaihhnawihah hian an state-a roads & buildings department-a engineer pali chu an hna atangin a chawlh lailawktir a. Heng mite hi Executive Engineer NM Nayakawala, Deputy Executive Engineers UC Patel leh RT Patel bakah Assistant Engineer JV Shah te an ni.
Chief Minister Patel-a hi roads & buildings department changtu a ni a, mi thiamten lei chei that dan tur leh a that dan te an endik nghal tih a sawi a, hemi report behchhan hian engineer palite hi hrem an ni tih a sawi.
Patel-a hian department hotute chu an state-a lei dangte pawh a him tawk em tih endik nghal vek turin a ti bawk.
Hetih lai hian August, 2022 daih tawhah khan social activist-in lei hi a tha tawk tawh lo tia a lo tlangaupui tawh a nih avangin thuneitute hi sawisel an hlawh phah nasa hle.
Kum thum liam taa audio clip chu social media platform hrang hrangah a darh thar leh a. ‘Yuva Sena’ kalpuitu, social activist Lakhan Darbar-a’n R&B hotute hnenah lei hi siam tha emaw, a thar dawh tur emawa a tih lai a hriat theih a ni.
Darbar-a hian thuneitu pakhat hnenah Vadodara district panchayat member Harshadsinh Parmar-a pawhin department hnenah lei rinawm tawk tawh loh thu a thlen tih a sawi lang bawk.
Tual chhung chanchinbute chuan R&B Vadodara division Executive Engineer Nayakawala chu Nilaini khan mipuiin thinrimin an chim buai niin an tar lang a, officer hian department-in an endiknaah engmah him lohna an hmu lotih a sawi thung.
“Lirthei zawh phal loh tura khar ngaihna a awm lo va. Report-ah pawh endiknaah chhe lian hmuh a ni lo tih tar lan a ni a. Nikuma siam thatah pawh engmah fel lo hmuh a ni lo,” tiin chief minister-in a hnua a hrem zinga mi, Nayakawala-a chuan a sawi.
Gujarat-ah hian kum 2021 hnuah lei chim lian vawi li vel a awm tawh a. December, 2021 khan Ahmedabad daia Mumatpura flyover siam laiin a slab a chim a, tumah thi an awm lo hlauh.
October, 2022 khan British hun laia mi tawh, Morbi khuaa Machchhu chunga suspension bridge chimah mi 135 vel an thi.
June, 2023 khan Tapi district-a Mindhola luia lei dawh thar chimin tumah an na lo hlauh va. September, 2023 khan Surendranagar district-a Bhogavo luia lei chimin mi pali an hliam.
October, 2023 khan Banaskantha-a Palanpur khuaa lei siam laiah a slab chim vangin a hnuaia autorickshaw-a chuang mi pahnih an thi a. August, 2024 khan Surendranagar district-a Habiyasar leh Chotila khaw inkara mi, Bhogavo chunga lei chu lui lianin lain thi an awm lo hlauh.
Gujarat lei chimah mi 17 thi tawh, engineer pali hrem
