Hachhek biala tlawmngai pawlten NH 44A, Darlak to Tuidam (via Sabual lui) kawng chhia siamthat a nih hma loh chuan lirthei lian – HMV leh MMV ten zawh ve lo tura an ngenna chu Mamita truck neitute leh khalhtute chuan an hriatthiam loh thu sawiin, kawng hlui emaw a thar emaw chu siamthat thuai a nih loh chuan Mamit kawtchhuaha Hachhek bial atanga kal lirthei dan ve an tum tih an sawi.
Mamit Truck Owners Association thuchhuak chuan, Langkaih Group YMA, Taitesena Group YMA, Hachhek constituency huamchhunga village council-te, all political party, Hachhek Constituency Maxi Cab Welfare aiawhten July 25 atangin NH 44A, Darlak to Tuidam (via Sabual lui) ah HMV leh MMV chin tlan ve an phal lo nia sawiin, hei hian Mamit District SP-in helai kawnga lirthei tlan dan tur hriattirna a chhuah dinglai palzutna nia an ngaih bakah he kawnga tlan thin lirthei lian hmanga eizawngte tan harsatna a thlen tih a sawi
Tun dinhmunah NH 44A kawng thar chu ruah a sur chuan eng lirthei tan mah zawh ngam chi a ni lo, tiin, July 25 ah pawh kawng hlui lama tlan phal a nih loh avangin lirthei lian load la laklawh engemawzat tangin, excavator hmanga pawha chhuah zel an ni a; tam tak chu load la loin an let leh bawk tih a sawi.
Hetiang hi kan dinhmun a nih tawh avangin sawrkar hotute, Mamit district-a MLA-te leh department thawktuten an harsatna sutkian sak turin an ngen tih a sawi a. SP pawh a thuchhuah tawh anga helai kawng, NH 44A kan zawh ve theih nan a tul anga duty dah sak turin an ngen tih a sawi bawk.
‘Kan ngenna hi tih hlawhtlin a nih loh a, NH 44A kawng thar siamthat thuai a nih loh a, kawng hlui lama kan tlan ve Hachhek constituency NGO ten an phal loh zel bawk chuan, Mamit kawtchhuahah Hachhek constituency atanga lokal lirthei eng chi pawh tlantlang kan rem tawh bik loang,’ thuchhuah chuan a ti.
Hachhek bial thuchhuakah Mamit truck neitute lawm lo
