Hahni natna

Hahni (gum) hi Mizo ten a tlangpui thuin kan enkawl uluk tehchiam lo. I hriat loh lai chuan hahni natna i lo nei reng thei a ni. Tun tumah hian aesthetics dentist Kamlesh Desai-a’n hahni natna warning sign pawimawh ni a a sawi Times of India health section-in a tarlan te kan rawn chhuah chhawng e.
Hahni chianglo hriat theihna awlsam leh a lanchuah dan hmasa chu i toothbrush-a thisen a kai leh kai loh kha a ni. I ha i nawh lai emaw nawh zawh tawh hnuah emaw, chaw i ei lai emaw a thisen chhuak a awm a nih chuan fimkhur a tul. A chhan hriat si loh a hahni thi hi hahni natna vang a ni thei a, ngaihthah mai tur a ni lo va. A lanchhuah dan hmasa phenah hian thil serious zawk a lo awm phal thei a ni.
Hahni sen leh puam pawh hi ngaihthah loh tur a ni. Periodontal infection hian hahni a tipuamin a ti no thei. Heng hahni puam hi a na duh hle a, awm pawh a tinuam lo ve thei. Hahni puam sen hlar mai chuan hahni natna eng emaw tak kan nei tih a entir a ni.
I ha a lo sensitive viau chuan ngaihtuahnaa lo lut hmasa chu ha nget a ni, chutih rualin hetianga ha sensitive awm theihna chhan hi hanget vang ni lovin hahni natna eng emaw avang a ni duh zawk hle.
Thawk rimchhia pawh hi hahni natna vang a ni thei. Mithenkhatin an ka rimchhiat hlauh vangin thil rimna thenkhat an ei loh phah a, chutiang an tichung pawhin awmzia a nei vak lo thin. Hei hi a chhan chu hahni natna an neih vang zawk a ni. Bacteria leh kan chaw ei bangnawi kan ka chhunga chambang ten hahni natna an siam a, chu chuan Halitosis a awm tir thin. Halitosis chu thawk rimchhia kan tih hi a ni.
Hahniin ha a khuh chin a lo tlem ta hret hret a nih chuan hahni natna kan nei tihna a ni. Hahni a lo tawm a, ha a khuh chin a lo tlem a, ha a lang tam ta a, a chang phei chuan ha bul thut thleng te pawhin a lang thei. hei hi bacterial gum infection vanga hahni tissue a chhiat thin vang a ni.
Ha nghing pawh hi hahni natna vang a ni thei. Hahni leh ruh chhiat vangin ha a nghingin a sawi thei a, hahni tissue a lo chhiat chuan ha a nghing awlsam em em a ni, ha a tawlh sawn avangin ha inkar pawh a zauh phah thei.
Heng sign hrang hrang te hi i nei a nih chuan hahni enkawl uluk la, toothpaste-ah pawh zinc citrate awmna chi hmang ang che. Zinc Citrate hian hahni a veng a, hahni thi thin te pawh a tiziaawm thei.