Hunpui denchhena Mizorama halpuah leh halmawi lam chi phurluttu lirthei an mante chungah an khauh viau dawn a, sawrkar hnathawk phei chu an service thlengin a tuar dawn tih Home minister K Sapdanga chuan a sawi.
October 11-a Aizawl Faina Hmathlir sawihonaah minister K Sapdanga hian, humhlui thlahna leh kumthar hmuahnaah boruak tithianghlim lo zawng khera hman kan duh thin chu pawi a tih thu a sawi a. Mizorama halpuah leh halmawi lakluhna lirthei neitu leh khalhtu chungah an khauh viau dawn tih sawiin, chutiang halpuah leh halmawi Mizorama lakluh kawnga sawrkar hnathawk inhnamhnawih an awm phei chuan an service thlengin a tuar dawn tih a sawi.
Tunhnaia thuthar thehdarhtute an inkawmnaah zawhna chhangin Mizoram Police IGP Lalbiakthanga Khiangte pawhin, hunpui lai hian Aizawl khawpuia police station tinah team 4 tal an insiam anga, an man seng emaw seng lo emaw pawh nise, hma an la dawn tih a sawi. Heng halpuah/ halmawi halte hi video-in an la anga, complaint siamin a hnu ah an bawhzui dawn tih sawiin, chumi atan chuan tlawmngai pawl leh kohhran pawh phungbawmah an sawm tih a sawi.
Kum dangah halpuah/halmawi khap a nihin man leh chhui zui harsat avangin case an siam tam lo thin a, kuminah erawh case an siam tam ngei an ring tih sawiin, halpuah/ halmawi zuar dap hian dawr an check dawn bakah online-a chah lo turin mipui an hriattir tih a sawi bawk.
Halpuah/ halmawi phurtute chungah kan khauh dawn – Home minister
