Kum dang ang bawkin district tin thuneituten halpuah leh halmawi zawrh leh hal khapna thupek an tichhuak a. Chutih rualin dan kalha halpuah leh a kaihhnawih zuarte dap hna ngawrh takin kalpui a ni nghal a. Aizawl district hnuaia police ten an area chhung theuha dawr leh sumdawnna hmun bakah courier service-te dan kalha halpuah leh a kaihhnawih dan phal loh thil an zawrh leh zawrh loh ngawrh takin an enfiah a, halpuah leh halmawi man chhuah hlutzawng hi cheng nuai 10 chuang (Rs 10,32,571/-) a tling a ni.
Tunhma pawhin sawrkarin Krismas thlen hma thla hnih vel atangin halpuah leh halmawi etc. zawrh leh hal khapna thupek hi a lo chhuah tawh thin a, mahse awmzia a nei tak tak thei lo. Police lamin halpuah leh halmawi an han dap a, man pawh an man nual thin, mahse a hun a lo thlen meuh chuan, abikin Kumhlui thlah zanah, namen lovin halpuah leh halmawi hal a ni leh tho thin.
Mizote hian dan hi kan ngai pawimawh ve ta viau a, mahse a huhova dan bawhchhiat kan sim theih miah loh chu Krismas leh Kumthar vuakveta halpuah leh halmawi hal hi a ni. Khap a ni tih hre reng chunga halpuah leh halmawi hal duh an awm tho thin avangin a ruka lo zuar duh an awm phah zel mai niin a lang. A nihna takah chuan, mipui lam hian danin a phal loh thil hi ti duh ta miah lo se, tu mahin an zuar an zuar peih hauh lovang.
Chuti a nih chuan, khap thil ni si, a ruka zuartu an awm leh thin chhan chu mipuiin dan bawhchhiat kan hreh loh vang, tihna a lo ni ta a. Mipuiin a huhova dan kan bawhchhiat hian, dan kengkawhtute hian, ‘kan man seng chuang lo…’ tih chhuanlam siamin dan an kengkawh tha duh lo ve mai tihna nge ni ang? tih hi zawhna awm thei a ni.
Kristian ram tia chhal ngam Mizoramah hian, engati nge remna leh muanna rawn thlentu pian champha lawmnaah ber hian, dan kan bawhchhiat nasat em em zel le? Dan kengkawhtute hian a nihna tur angin dan kengkawh ngar ngar se, dan bawhchhia mipui an lo tam a, man sen loh an nih pawhin, an man theih chhun ang ang chu man zel mai rawh se; man ngam leh ngam loh nei lovin. Dan kengkawhtute hian dan anga thil an ti a nih phawt chuan, dem theih an ni lo.
Halpuah nuai 10 hu man…
