Krismas leh Kumthar vuakveta halpuah, halmawi leh puakthei khapna thupek chu sawrkarin November thla khan a tichhuak a, Central YMA lam pawh phungbawmah a sawm a. Central YMA pawhin sawrkar ngenna hi chhangin hmalak an tum thu tunhnaiah an auchhuahpui a; Sub-Hqrs. YMA leh Branch YMA zawng zawngte mahni huam chhung theuha hma la turin an hriattir tawh nghe nghe a ni.
Kum sawm li vel hma lam atang daih tawh khan halpuah leh halmawi chi hrang hrang hi Krismas leh kumthar lawmna chikhat atan uar taka hman a lo ni tawh a. A nghawng a that loh em avangin sawrkarin a han khap a, mahse hun rei tak chu khapna hian awmzia a nei thei lo. A hnuah zawi zawiin kan zia chho hret hret a, Krismas-ah halpuah hal a ni ta lo a, kumhlui thlah zanah erawh darkar chanve vel chu hal a ni ta chauh a.
Kum 2013 atangin sawrkar berin kumhlui thlahna leh kumthar 2014 lawmna atan sum sengin khawpui ber Aizawlah chuan halmawi halna hmun bik a siam leh ta mauh mai a, kha khan mipui rilru a chawk tho leh ni tur a ni a, a hnu lamah mipuiin halpuah leh halmawi khapna an palzut chho leh ta a, tunah hian YMA phungbawma sawm ngai hial khawpin halpuah hal a lo hluar leh ta a ni.
‘|anrual hi chakna a ni’ tih thufing hi kan lam ri awl lo va, eng emaw thilah ‘i tangrual ang u aw’ tiin aw chhuahin tha kan han seng thin a, mahse a hlawhtling hlei thei thin lo; a chhan chu kan tanrual tawk loh vang a ni mai.
A nihna takah chuan chhungkua atang hian inkhap bet thei ila chuan, pawl, kohhran, khawtlang leh sawrkarin a buaipui luai luai hi ngai lo tur a ni a. Chhungkua atanga inkhap beh theih loh a nih tak avangin, khawtlang, pawl, kohhran leh sawrkar kan buai ta chiam mai a ni a, a ler lam atanga thuai thlak a ngai ta thin a ni.
Tun dinhmunah pawh hian, veng thenkhatah chuan a puak leh dum dum tan tawh a, YMA bakah tualchhung sawrkar (local council) leh kohhrante pawh hian an platform atanga tan an lak theuh chuan, chu tanrualna chuan awmzia thui tak a nei ngeiin a rinawm. |an rual tak tak a ngai a ni.
Halpuah… tan rual a ngai
