Palestinian thuneitute chuan Gaza beihna thar berah naupang eng emaw zat telin mi 13 vel an thi tih an sawi.
Gaza-a Civil Defence Authority chuan Israeli sipai thlawhnaten Gaza City, Khan Younis leh Deir el-Balah an kap tih a sawi.
Inrinni zana an kah hi Israeli-ten a zawna zan hnih an kahna a ni a, Hamas-in an ralthuamte US President Donald Trump-a siam Board of Peace kuta dahna tur an pawm hnu vek a ni.
Israel Defense Forces (IDF) chuan Gaza-ah hian helho awmna an kap a, Hamas pahnih an thi niin a sawi.
Israeli Energy Minister Eli Cohen-a chuan Pathianni khan ram 70% an thunun mek, Gaza Strip-a beihpui an thlakna titawp turin eng inremna mah siam a la ni lo tih a sawi.
Board of Peace-in Israel chu inhnukdawk tura ruahmanna a siam mek laiin Cohen-a chuan strip hi Hamas-in an ralthuam an dah vek lo a nih chuan an thuhnuaia dah vek a tul tih a sawi bawk niin Reuters news agency chuan a tar lang.
IDF chuan Pathianni khan X-ah Hamas commander pahnih an that a, Nukbha force-a mi leh Maghazi Battalion-a mi a ni tih an tar lang.
IDF hian kar hmasa khan Gaza hmar lamah Jabalia Battalion-a tel Hamas hel an lo that tawh bawk niin an sawi a. Heng mi pathumte hi Israeli-te beih tumtu vek niin an sawi bawk.
Palestinian damdawi in thuneitute chuan Gaza City-a chenna in beihnaah naupang pakhat leh puitling an thi a, Gaza hmar lama Jabalia-ah mi pakhat a thi bawk tih an sawi.
Khan Younis-ah fa, nu leh an fapa kum kaw mi chu an in kahnaah an thi a, Deir el-Balah-ah apartment block beihnaah mipa leh hmeichhia an thi bawk.
October thlaa inkahhai kalpui a nih hnuah Palestinian 1,100 chuang thah an ni tawh.
Kar hmasa khan President Trump-a chuan Board of Peace-in Gaza-a Hamas leh ralthuam keng pawl dang zawng zawngten ‘ralthuam dah vek turin’ inremna an siam ta tih a lo puang tawh.
Zirtawpni khan Trump-a hian Israel pawh he rawtnaah hian ‘a hlim hle’ tih a sawi a, ‘Middle East tan rahbi pawimawh tak’ niin a sawi bawk.
Hetih lai hian Israel erawh Hamas hian an ralthuam an dah vek dawn em tih an ringhlel rih hle a, Gaza thunun vek an la tum zel dawn em tih pawh an la tichiang lo.
Hamas-in ralthuam an dah hi US-in Gaza indona titawp tura ruahmanna a neih thawh hnihnaa tel a ni.
Point 20 awmna ruahmanna hi September thlaa siam kha niin inremna kalpui dan viltu tur Board of Peace din a ni a, Hamas ralthuam dah, Israeli sipaite chhuah leh Gaza tun din thlengin an vil ang.
Zirtawpni khan point 15 awmna kal zel dan tur tihchhuah leh a ni a, hetah hian inremna a taka kalpui dan tur ziah a ni.
Board of Peace hi Cairo atanga hna thawkin Gaza an la lut lo.
Thlalem atanga a lan dan chuan November thla khan Israel chuan inkahhai kalpui hnuah Gaza an thunun china in 1,500 chuang an tichhe tawh a. A lan kim vek loh avangin a zat dik tak phei chu hei aia tam tura ngaih a ni.
October, 2023 atanga indona a chhuah hnuah UN chuan Gaza-a hnawm leh hnawk awm hi tonne maktaduai 60 vel a tlin a ring.
Ram tam takin firfiak pawla a chhal, Hamas hian kum 2007 atang khan Gaza Strip-ah hian ro an rel a ni.
Hamas-in ralthuam dah a tum hnuah Israel-in Gaza-ah mi 13 that leh
