Tun hnaiah India chuan United Nations-ah Israel-Hamas buaina chungchangah a ngaihdan sawiin joint statement siamnaah te telin vote pawh a thlak.
Prime Minister Narendra Modi chuan virtual summit tum hnih kovin G-20 session kharnaah leh ‘Voice of Global South’ summit neihnaah a ni a, chungah te chuan Israel-Hamas buaina te a sawi lang ve ve bawk.
India dinna?
Hamas tena 7 October a Israel an run a, mi 1,200 chuang an thah hnuah leh Israel-in Gaza a beihleta mi 13,000 chuangin nunna an chan phah tawha India dinna chu multi-layered tih a ni.
Modi sorkar chuan firfiakna chi reng reng chu na taka demin Hamas ten an beihnaah Israel an thlawp tlat thu sawiin mahse Hamas te chu terror group-ah erawh a puang chuang lo. India sorkar chuan insum, inbiakna leh diplomacy ngiatin civilian te thihna a demna hle thung a. US, leh Australia te nen ‘ceasefire’ ti si lovin ‘humanitarian pause’ tiin hma an la bawk a.
Chutih rual chuan India chuan ‘two-state solution’ chu a thlawp tlat thu sawi thungin Palestine state chu Israel hrulah a piang thei a ti a, Palestinian mipuite ‘socio-economic welfare’ a ngaihven a ti bawk a, tanpuina 70 tonnes leh damdawi leh medical lam thil 16.5 tonnes Egypt kaltlangin Gaza-ah a thawnlut tawh bawk.
Modi erawh chuan BRICS plus summit neiha South Africa rawtna ram sawm pakhat hruaitu tena an pawm zui Gaza a beihnaah Israel chuan war crime a kalpui avangin International Criminal Court-in chhui rawh se tihah a tel ve lo bawk.
United Nations a October 26 a Israel chu ceasefire kalpui tura nawrna vote thlakah India chu a hai bawk a. Mahse, UNGA ‘Fourth Committee’ in November 9 a West Vank leh Syrian Golan a Israel settler policy an duhlohnaah vote a thlak leh thung.
India-in Khawthlang ram nge Global South a awn zawk?
Non-Aligned Movemnet leader a nih angin India in Israel-Palestine buainaa a ngaihdan chu Global South ngaihdan nen a inzul a, Palestinian cause chu a thlawp a ni. Buaina tawp se a duh a, chutihrual chuan kum 1992 atang khan Israel nen defence, counter-terrorism cooperation leh trade lamah inzawmna an sawhnghet hle a ni.
Kargil indo hnu atang khan Israel chuan India chu weapons leh ammunition a pe nasa bawk a, chu chu UN level a Israel laka a tawngkamah a danglam hle tih a lang a. Gaza bomb avanga Israel demna sawiah pawh a tim hle.
October 26 khan Israel demna resolution siamnaah a hai zui bawk a. India chuan US kaihhruaia October 7 terror attack thleng demna leh Gaza a eitur leh mamawh chawkluh theihnnana ‘humanitarian pause’ rawt chu a thlawp bawk a ni.
Khawthlang ram te ang lo takin India chuan Hamas te chu a khap emaw terror organisation ah a puang ve lo bawk a. Hamas te terror organisation ah puang se a duh avangin Israel chuan India kar nan Mumbai 26/11 terror attack mawhphurtu Lashkar-e-Taiba te chu kar kalta khan terror organisation-ah a puang a ni.
West Asia a nghawng dan tur?
India leh Israel inlaichinna a that rualin Palestine aia Israel a thlang chiang a nih chuan Gulf leh Arab world te nena an inlaichinnain a nghawng nasa dawn tih a ni thung. Heng ram te hi India nena inzawmna thuk tak nei vek an ni a.
Kum tam tak chu India chuan UAE leh Saudi Arabia nen inzawmna tha bik an kalpui tawh a, heng ram te hi Israel nena inzawmna nei tha niin Abraham Accords ziaktute an ni. Hei vang hian India-Israel-UAE-US (I2U2) trade initiative pawh tun hnai lawmkah siam niin India-Middle East-Europe Economic Corridor pawh siam a ni a, hei ntak hi derthawnga awm thei niin a chhan chu Israel-Hamas buainaah Arab League leh Organisation of Islamic Cooperation te chu an thinrim em vang a ni.
Israel hmelma kumhlun Iran leh India inlaichinna pawh tun hnaiah Chabahar port leh International North-South Transport Corridor to Central Asia hmangin tihngeh zual a ni a. Modi hian Israel leh Palestine buainaah tanbik a neih ziah chuan Russia nena an inlaichinna pawhin a nghawng phah ang tih a ni bawk.
Israel company te chuan construction industry lamah palestinian workforce te thlak turin Indian nuai khat dawn chhawr an duh thu an sawi tawh a, New Delhi-in chhan letna a la pe duh lo, a chhan chu Gulf rama Indian hnathawk maktaduai 8 vel a nghawng thei dawn a ni.