Hamas leader lawk tihlum

Hamas leader Marwan Issa chu Israeli air strike avangin a thi tiin White House official Jake Sullivan chuan a sawi.
Deputy military commander Issa hi nikum 7 October atanga indona kalpui tan hnua Hamas most senior leader nunna chan hmasa ber a ni.
Palestinian group te Gaza thununtute chuan a thih chungchangah engmah sawi an la nei lo thung a.
Israeli media sources te chuan Issa chu central Gaza a akarkaltaa Nuseirat refugee camp hnuaia tunnel complex beihnaah a thi an ti thung.
Hamas military wing- Izzedine al-Qassam brigades deputy commander niin Israel mi duh ber te zinga mi a ni a. European Union pawhin terrorost blacklist zinga a telh a ni bawk.
Palestinian intifada hmasa ber khan Israel chuan manin kum nga lunginah a khung a, a hnuah intifada hnihna kum 1997 khan Palestinian Authority te chuan an man leh a ni bawk.
Israeli military te chuan Hamas senior leader te chu 7 October hnu atangin an tihlum nual tawh a, Hamas political leader Saleh al-Arouri pawh Beirut chhimlama Dahiyeh ah an tihlum tawh bawk.
Sullivan, White House national security adviser chuan Hamas leader lawk rual te chu Gaza-a Hamas tunnel network chhungah an tawm rin a nih ber thu a sawi a.
US chuan Israel-in Hamas leader te man tuma a zawnna lamah a thlawp tlat thu sawiin an phutawk hremna an hmu tur a ni a ti bawk.
Chutih rual chuan US President Joe Biden chuan Gaza a civilian te nunna chan tam lutuk chu a ngaihmawh thu sawiin Israeli Prime Minister Benjamin Netanyahu a biak thu a sawi bawk a.
US president chuan Israel chu a thlawp tlat thu sawiin leh Hamas te nuaibo tumna chu a thlawp tlat a tih rualin Israel chu Rafah city run lo turin a ngen thung a, a chhan ber pawh Rafah ah chuan refugee maktaduai chuang an awm vang a ni.
Israel-in Rafah a run chuan pawisawi lo civilian tam zawkin nunna an chan phah ang a, humanitarian crisis turu zawk thlengin Gaza buaina chu thuk zawka kalin khawvelin Israel a kawmserh phah thei a ni tiin US national security adviser chuan a sawi bawk.
“President chuan prime minister Netanyahu hnenah Hamas te nuaichimih chu an duh tlan ve ve a ni a, mahse, chumi ti tur chuan substainable strategy neih a ngai a ni tiin a hrilh” tiin Sullivan chuan a sawi.
Biden chua Israeli leader chu US-in Rafah run a duh loh em avangin Washington ah sawihona nei turin senior interagency tem te military, intelligence leh humanitarian official te telna tirh a remti tiin a sawi bawk a. Chu meeting neih hma chuan Israel chuan Rafah chu a bei rih lovang tiin Sullivan chuan a sawi bawk.
Netanyahu pawhin President Biden nena sawi dunna an neih thu sawiin, “Kan tum ber chu Hamas-te nuai chimih a, mi tâng te chhan chhuah leh Gaza chu Israel tana hlauhawm ni ngai tawh lo tura siam leh humanitarian aid pek a ni,” tiin a sawi bawk.