Hamas nena indo turin kan la inpeih – Netanyahu

Israeli Prime Minister Benjamin Netanyahu chuan inkahhai thawh hnihna atana inbiakna neih tur a hlawhchham a nih chuan an ram chu Hamas nena indo tura a la inpeih reng thu a sawi.
Pathiannia inkahhai puan kalpui tan hma lawka television-a thuchah a sawiah Netanyahu chuan inkahhai chu ‘lailawka kalpui’ mai a nih thu a sawi a. Israel chuan Gaza rûn turin dikna chanvo a la nei reng tih a sawi.
Netanyahu-a hian thla 15 chhung Israel-in sipai chakna a hmanah hlawhtlinna an chante sawiin heng zingah hian Hamas hotu, Yahya Sinwar-a an thah pawh a sawi lang.
“Middle East hmelhmang kan thlak a ni,” a ti a, tunah chuan Hamas chu ‘anmahni chauh’ an nih tak thu a sawi.
Inkahhai hi an ram huna zing dar 08:30 (India huna chhun dar 12:00) atanga kalpui tan kha a ni.
Inrinni zana thuchah a tihchhuah hma lawk hian Netanyahu-a hian Hamas-in an ram mi a la hren mekte zinga a chhuah turte hming a tihchian hma chu Israel-in inkahhai chu a taka a kalpui dawn loh thu a lo sawi tawh bawk.
“Israel hian inremna bawtchhiatna a ngaizam mai mai dawn lo,” a ti.
Hamas-in mi a hren a chhuah tur 33-te hming chu Israeli chanchinbute chuan an chhuah chuai chuai tawh a; mahse, official-a puan a la awm lo va. Hetih lai hian Israeli thuneitute erawh chuan Pathiannia chhuah tur mi pathum hming chu an dawng tawh thu an puang ve thung.
Hetih mek lai hian Israel hian Gaza-a Hamas leh Islamic Jihad hmun nia an sawite chu thlawhna atangin a la kap zel a. Hamas chuan Nilainia inkahhai tur inremna puan a nih atangin mi 120 chuang thah an ni leh tawh niin an sawi.
Chawlhkar tlem lo awm leh tur chhung hian Israel-in Palestinian lung in tang 1,890 thleng nan mi hran 33 chhuah an ni dawn a. Inremna ang chuan Israel hian Gaza atangin a sipaite a hnuk kir hret hret bawk ang.
Khawi hmunah nge mi hrente hi inhlan a ni dawn tih sawi chian a awm lo va. Israeli sipai thuneitu sang chuan Gaza hmar, laili leh chhim lam rmariah reception point pathum siam a nih thu a sawi.
A hma khan Hamas chuan AFP news agency hnenah an chhuah hmasak tur pathum hi hmeichhia tih a lo hrilh tawh.
Inkahhai thawh hnihna atana inbiakna hi a thawh khatna kalpui atanga a ni 16-na atanga tan tur a ni a, hei hi chu ‘indo tihtawpna tak tak tur’ atana tih a ni.
Thawh hnihnaa inremna neih tur hi puan chian a la awm lo va; mahse, mi hren chhuah bâng chhuah te leh Israeli lung ina Palestinian tang la awm tam zawk chhuah te pawh a tel rin a ni.
Gaza atanga Israeli sipai zawng zawng chhuahna tura inremna pawh a tel beisei a ni a. Heti a nih chuan ralthuam keng lo Hamas police-ten Palestinian tlanchhia sang telte Gaza hmar lama an let lehna an kenkawh a ngai dawn tihna a ni ang.
Thawh thumna leh a hnuhnung ber chu Gaza tun din lehna tur a ni dawn a, hei hi chuan hun a duh rei dawn a, mi hren thite ruang lak let pawt a tel ang.
Zirtawpni zan khan Israel sorkar chuan rei tak sawiho a nih hnuah inkahhai puan leh mi hren chhuahna tura inremna hi a pawm.
Far-right cabinet minister pahnih erawh chuan an duh lo va, an zingah hian National Security Minister Itamar Ben-Gvir pawh a tel.
Inrinni khan Tel Aviv-a thingpui dawr bula chemte-a mi beihna thlengah tam tak an hliam niin Israeli police chuan an sawi a. A titu hi kah hlum nghal a ni.
A titu hi Israel-in a awp West Bank-a Tulkarm atanga ‘dan lova’ Tel Aviv-a lut niin Israeli media chanchinbuten an tar lang.
Nilaini zanah inkahhai tura inremna puan a nih tawh laiin Gaza-a Palestinian-te tan erawh danglam a la awm lo va. Palestinian health ministry chuan hemi hnua beihna thlengah hmeichhia leh naupang tam tak telin mi 123 an thi tawh niin an sawi.
Tar lan tawh thin angin Israeli sipaite hian Hamas chhut chimih tumin an bei a. Israel, US leh ram dang eng emaw zatin firfiak pawl tia a chhal hian October 7, 2023 khan ralthuam nen Israel luhchilhin mi 1,200 an that a, mi 251 chu hren turin an la bawk.
Phuba lak nana Israel-in Gaza a rûnnaah mi 46,899 vel an thi tawh niin Hamas enkawl Gaza a health ministry chuan a sawi a. Mi maktaduai 2.3 vel tlanchhiain thil a chhe nasa hle a, ei tur, tuialhthei, awmna tur mamawh tak takte tan puihna a lut hleithei lo bawk a. Harsatna namenlo Gaza in a tawk mek a ni.