Sawrkarin hand holding policy a kalpui turah MLA-te chu an bial theuha an thlanchhuah (partner) te tih that lamah inel turin a sawm tih chief minister Lalduhoma chuan a sawi.
Nilainia Assembly Session-a a bill putluh “The Mizoram Ceiling on Government Guarantees (Amendment Bill 2024” sawiho tlangkawmnaah chief minister hian India sawrkar leh state sawrkar dangte pawhin an mite chawikanna tur scheme an siam a, chu’ng zingah chuan Mizoram sawrkarin tuna Hand Holding Policy a duan ang tluk a la awm ngai loin an hria tih a sawi a. An mi thlanchhuahte chu ‘beneficiery’ pawh ti loin ‘partner’ an ni tih a sawi.
Department tinin line officer an nei anga, an ni hian an department theuhah a diltute an lo buaipui dawn tih Lalduhoma hian a sawi. “An hna lo thawh lai bakah an thawh tur, an hna penhleh a ni dawn loa, an hna pui ber a ni dawn. Sawrkar flagship programme a ni a, department tinin number 1-ah an dah dawn a, a hlawhtling ngei ngei tur a ni,” a ti.
Party line emaw chhungkhat line-in emaw thlan tur a ni loa, eng trade nge a thlan, hlawhtlinpui tlak a ni em, a trade thlangtu mihring hi mi rintlak leh mi tumruh a ni em tih kha an en ber tur a ni tih a sawi.
“Partner thlanchhuahten loan an lak hnu ah a takin an kalpui anga, chu chu nodal officer-te hian an enzui pui ang. Heng nodal officer-te hi loh theih loh a nih loh chuan project laklawh lai hi chuan transfer ni lo se kan ti a. A hlawhtlinna stage an thlen thleng tal a mihring ngaiin enkawl zui se kan duh a ni,” chief minister hian a ti.
Loan lak rulh sak chu state sawrkar kut a ni vek dawn loa, loan interest zaa 25 chauh state-in a tum dawn tih a sawi a. Convergence-a kal tur a nih hlawm avangin sawrkar laipui scheme kal lai nen tangkhawm tur a ni dawn a, zaa za loan interest rulh sak lam kha state sawrkar ruahman dan a ni lo tih a sawi a ni.
MLA-te chu hand holding policy hnuaiah hian tunge tha ber inel turin a sawm a. Anmahni bial theuha partner an thlante chu enpuia an hmalakna tlawh sak thin turin a ngen a ni.
House-a CM sawi dang:
* Designation plate kan tar loang tih hi 2018 inthlana kan manifesto a ni. Kum 5 a lo liam a, MLA tan designation plate tar loh ngawt hi thil remchang lo tam tak a awm a ni tih kan hmu a. Inthlan hnuhnung berah chuan hei hi telh tawh lo ang u, tiin kan paih.
* Party unit neih loh tih hi, pawl 7 inzawmkhawm kan ni a, ka a tam a, a lo sawi tawk an awm a nih pawhin, party ang chuan hei hi rel leh sawi a ni lo.
* CM Special Package-ah a line officer-te thlan tur a ni a, duhsak zawng inpek ngawtna tur a ni lo.
* Guarantor-a sawrkar a tan tur hi mipui kan dahkhamna niloin, mipui tan keimahni kan indahkhamna zawk a ni.
* Loan puk tur chungchangah central scheme tam tak awmsa a awm a, bank nen MoU kan ziak dawn. Mizorama bank awm zawng zawng ka sawikhawm pui tawh a, an phur em em a ni. Mi tak tak, hlawhtling tur in rawn thlan tawh dawn avangin kan phur a ni, an ti.
* Kuhva hi sawrkar laipuiin chin belh a awih tawh loa, a awmsa erawh kan enkawl zui zel ang. A processing kan buaipui mek a, rawng (dye) siam nana hmang duh an awm a, kan indawr mek. Gutkha ni lo, thildang siam tum chu kan welcome a, hnamdang kan lalut lo thei dawn lo thung.
* Bill thenkhat treasury-a lut tawh engemawzat kan nei a, kan la pe mai ngam lo. Treasury-a thleng tawh zawng zawng kan pekchhuah chuan kan minimum balance a awm lo dawn a, kan ‘red’ mai a hlauhawm. Ceiling kan siam tawh loa, zalen takin kan kal a, treasury thleng tawh bill chu a chhuak hnai tawh hle tihna a ni ang.
Hand holding-ah MLA inel ang u – Chief minister
