Spain-a Canary Islands-a ding, hantavirus-in a tihbuai cruise ship-a chuangte chu anmahni ram theuhvin thlawhna hmangin an hruai haw hlawm.
Tenerife atanga thlawhna bik hman hmangin Spanish 14-te chu an khawpui, Madrid-a sipai damdawi inah khung hran tura phurh haw an ni a. An hnungah hian French-te chu Paris-ah an hruai a, British-te chu Manchester-ah an hruai bawk.
Tenerife-a hetiang hmalaknaa chete hi hazmat suit var nena inthuam niin thlawhna tumhmunah anmahni chauh kalna tur kawng duan zelah kalpui an ni.
Dutch lawng, MV Hondius-a hri leng vang hian mi pathum an thi tawh a, an zinga pahnih chu hantavirus vei nia hriat an ni.
Pathianni vek khan Turkish, Irish leh US mite pawh thlawhnaa phurh chhuah a ni bawk a, ram dangte pawhin an mite hruai haw turin an buatsaih mek bawk.
Spanish Health Minister Mónica García-i chuan beihpui thlak chu a kal dan pangngaiin a kal zel tih sawiin, MV Hondius-a chuang zawng zawngte chu natna lan chhuahna nei lo an nih thu a sawi.
MV Hondius hi Pathianni khaw var hma khan Granadilla lawng chawlhhmunah a lut a, a chuang zinga thi hmasa ber kha thla khat liam taa tuipuia a awm laia thi a ni.
Lawng hi a din fel hnuah military police lawngten an veng a, passenger leh thawktu 100 chuang an lak chhuahna tur hian hma an la.
Zing dar 07:00 (India-a chawhma dar 11:30) velah medical team-te lutin a chuangte hri kai leh kai loh an enfiah vek.
Netherlands lam pan tur thlawhnain mi 27 vel phurh an ni a, an zingah hian Belgian, Greek, German leh Argentine mite an tel a, thlawhna dangten an zui a. Thlawhna hnuhnung ber pawhin Thawhtanni khan Australia a pan.
Cruise-a chuangte hi Tenerife an chhuahsan hnuah khung hran an ngai a, hei hi virus hian chawlhkar kua thleng a natna lan chhuah theihna a neih avangin enthlak an ngai a ni.
World Health Organization (WHO) chuan cruise-a chuangte hi ni 42 tal khung hran a rawt.
Tenerife-a Candelaria damdawi inah chuan MV Hondius atanga hruai chhuahte zinga na an awm palha enkawl turin intensive care specialist tam tak inrintir an ni a. Isolation facility-ah testing kit leh ventilator nen an inring.
Hantavirus-ah pawh a vâng chi, Andes strain darh ven hna hi Health Minister García-i chuan ‘beisei phak baka hautak’ a nih thu a sawi.
Tenerife-a lawnga chuang lak chhuah enpuitu, WHO hotu Tedros Adhanom Ghebreyesus chuan tha takin thil an kalpui tih a sawi.
Hri hi Argentina chhim tawpa bawlhhlawh paihna hmun, sava entuten an tlawh thin hmun atanga darh a nih rin a ni.
Hantavirus-in a tihbuai lawnga chuangte phur chhuak
