Harsa takin Liverpool an chak

Nilaini zan khan UEFA Champions League 2025-26 khelh chhunzawm a ni a, inkhel hmuhnawm takah Liverpool chuan harsa takin an mikhual Atletico Madrid an hneh thei hram. Liverpool an chak lai hian London club lian Chelsea chu mikhual an nihna hmunah an tlawm ve thung.
Reds chakpuitu
Van Dijk
EPL champion Liverpool hian Anfield-a an mikhual Atletico Madrid lakah bul an tan tha viau a, inkhel tan atanga minute ruk chhung lekin goal hnih an thun hman der. Hma takah goal hnih thun bawk mah se an hmahruaina an humhim zo lova, an chak zo lo teuh hle. Atletico nen an inhnehtawk mai dawna a lan hnu hun pek belhah Virgil van Dijk goal thun hmangin hnehna an chang hram a, an mualah harsa takin point thum an hlawchhuak thei hram.
Reds tan hian Andrew Robertson chuan inkhel tan atanga minute lina lekah vanneihthlak ang reng takin hmahruaina goal a tilut. Robertson hian Mohamed Salah free-kick chhuih, Atletico Madrid lamain an lo dan per lehchhawng chu vanneihthlak takin a lo tawk fuh a, si nghak Oblak rin loh lamah rang zetin a lut a, hmahruaina goal a thun.
Robertson goal hian mualneitu Liverpool a fuih phur viau a, na takin an mikhualte an nawr zui nghal. Hmahruaina goal an thun atanga minute hnih hnu lekah Mohamed Salah chu chep tak kar atangin a dawkchhuak nawlh a, awlsam taka goal thun zuiin an hmahruaina a tizau. Minute ruk chhung leka goal hnih an thun nghal vangin EPL champion Liverpool an phur a, awlsam taka chak zui thei tura ngaih an ni.
Bul tan chhe viau mah se Spanish club lian an insiamtha chho a, an khingpuite an chai thei ta viau. An si phurh an sut theih loh reng hnuin Marcos Llorente chuan chawlhlawk dawn hnaih minute 45’+3-ah goal thunin an si phurh a sut then. Llorente goal thun hian Anfield-ah chak theih beiseina a siam thar a, phur tharna nei chungin chawlhlawk an hmang.
Chawlhlawk hnu lamah Atletico Madrid an khel tha chhunzawm a, goal thun hmasa zawkah an tang zui leh. Hun tawp dawn hnaih minute 81-naah an goal khatna thuntu Marcos Llorente chuan goal thun belh lehin an si phurh a sut zo. Hun tawp dawn tepah an si phurh an sut zawh vangin Atletico Madrid hi an phur viau a, English club lian lakah point hlawhchhuak ngei turah an inngai hman.
Goal hnih an chhuah zawn hnuin Liverpool an harh thar a, chak ngei tumin tan an khawh thar leh. Hun pangngaiah goal thun belh thei tawh lo mah se hun pek belh an chhawr tangkai ta thung. Minute 90+2-ah defender Virgil van Dijk chuan corner atanga ball kal chu fuh zetin a tauh goal a, hma an hruai let lehna goal a thun. Van Dijk goal thun hmangin Reds hian hnehna an chang a, point thum hlu tak an hmu zui ta a ni.
Season tharah Liverpool hi khel tha tia sawi hluai tur an ni lo naa an chak thei riau thung. An chak zo dawn lo emaw tih hnu; hun tawp dawn hnaih lamah chakna goal an thun thei riau a, an ti nek nek a, an chak leh mai thin. An chak chhoh dan hi a champion zia ruih mai a, champion zia an chhuah reng thei ang em tih erawh a chiang lo thung. An chak dan hi lawmawm viau thin bawk mah se an mahni tantute erawh an tihlauthawng thei viau zel thung.
Chelsea an tlawm
Liverpool in harsa taka hnehna an chan laiin English club lian Chelsea erawh chu mikhual an nihna mualah Bayern Munich ngam lovin an tlawm ve thung.
London club lian Chelsea hi German champion Bayern Munich hmachhawn turin Allianz Arena-ah an leng lut. An len luhna mualah an vanduai a, own-goal hmangin goal an chhuah hmasa. Inkhel tan atanga minute 20-naah Trevoh Chalobah chuan an lamah a ti-goal palh a, mualneitu Bayern hmahruaina goal a thunsak.
Goal thun hmasa zawk an nih vangin Bayern an phur a, goal thun belh theihna hun tha an nei zui leh thuai bawk. Hmahruaina goal an thawhchhuah atanga minute 7-naah penalty an hmu zui leh. Penalty hi Harry Kane chuan minute 27-naah harsa lo takin a pet goal a, an goal hnihna thunin an hmahruaina a tizau.
Vanduaithlak ang reng takin goal hnih chhuah zawn mah se Chelsea an buai mai lova, chakna thar nei leh turin goal an thun thuai. Penalty an chawi atanga minute hnih hnu lekah Cole Palmer chuan goal thunin an si phurh a sut then. An si phurh an sut then vangin Blues an phur viau a, inkhel hmuhnawm zawk an lantir. Inkhel hmuhnawm takah goal a luh belh theih loh hnuin Harry Kane chuan minute 63-naah an goal thumna a thun zui leh a. Bayern Munich chuan an mualah 3-2 in hnehna an chang a, English team lian Chelsea lakah point thum an hmu.
Nilai zana inkhel dangah champion lai PSG in 4-0 ngawtin Serie A club Atalanta an hneh a, an trophy kawl mek humhim an tumnaah tha zetin bul an tan.