Hat-trick nena kir ropui Messi
Karhmasa mai khan hliam thawhsanin captain Lionel Messi chuan Argentina tan khelmual a lut a, Venezuela lakah a team chu hnehna a chanpui zo lo a; Thawhlehni zan South American World Cup qualifying-ah goal thum khungin Bolivia lakah 6-0 hnehna a chanpui a, international hat-trick vawi 10 a siam tlinna chiah a ni nghe nghe.
Kum 37-a upa ni tawh Inter Miami forward hian Buenos Aires khaw khelmual lar Monumental Stadium-a goal thum a tihluh piahlamah a pawlte thun tur goal hnih dang a siamchhuak a, men’s international football-a hat-trick siam hnem ber Portugal captain Cristiano Ronaldo record a nihrualpui ta bawk.
South American qualifying group table-ah anmahni hnaihbertu Colombia laka point thuma sangin Argentina hian point 22 hum chungin hma an hruai a; an qualifiers match hmasa lamah September thla khan Colombia hneh loin, karhmasa maiah Venezuela inhnehtawkpui mah se dinhmun sang berah an la ding thei cheu a ni.
United States, Mexico leh Canada-te inthlentawm tur 2026 World Cup-ah hian South America khawmualpui group atangin a sang paruk chu automatic-in an tling dawn a ni.
Tun kha kumin July thla Copa America khelh laia a inhliam hnua Argentina tana Messi inlan vawihnihna chauh la niin, Buenos Aires inkhel tan atanga minute 19-na lekah an mikhual defender pakhat Marcelo Suarez tihsual nangchingin goal hmahruai a thun.
Chawlhlawk dawnah Lautaro Martinez goal tur siamsakin, second half tir lamah Messi bawk hian Julian Alvarez goal tur a chhawpsak leh a; minute 70-ah Nahuel Molina pass atangin substitute Thiago Almada chuan sili faia mualneitu team hmahruaina goal a thawh ve leh.
4-0 a nih hnuah pawh Argentina leh an captain hian duhtawk an la ngah lo a, hun tawp lam minute hnih chhungin Messi hian Bolivia goalkeeper Guillermo Viscarra ven goal-ah tum hnih ngawt a khung zawn thawt a; ti hian ram tana game 189 a khelhah goal 112 tilut tlingin, men’s international goal khung hnem ber Ronaldo (133) chiah hetih kawngah hian phak loh a nei tawh.
Inkhelh banah Messi chuan a hming lam ri dual dualtu supporter-te duhsakna dawng tura Monumental Stadium a lut leh thei lawmawm a tih thu leh an thlawp tlatna chuan chakna a pe tih a sawi a, “Chu chuan ka din meknaah nuam tihna min pe a, tun mekah hian ka kumte lo tam ve tawh mah se he team-a ka thla a muan tlat avangin naupang ang maiin ka la inngai.
“Team tana la tha tawka ka inngaih chhung leh ka duh anga ka la khelh chhuah theih chhung chu nuamti takin he team-ah hian ka tel zel ang,” tiin a chawlh puan hun tur huphurh em em a chipuite a thlamuan!
Hat-trick nena kir ropui Messi
