Hawaii kangmei chhuak avanga nunna chan mi 99 tling tawhin tun atanga ni 10 chhungin a letin an pung thei tiin state governor chuan a sawi a. Emergency personnel te chuan mihring ruang zawngin theihtawp an chhuah mek tiin a sawi bawk.
Kar kaltaa Maui island kangmei chu US wildfire awm tawh zinga rapthlak ber niin Lahaina khawpui chu a kangchhe nasa hle a.
Governor Josh Green chuan nunna chan an la pun belh dawn chiang tia sawiin emergency team te chuan theihtawp chhuahin hma an la mek tiin a sawi bawk a. “Kan hriatchian theih chinah nunna chan 99 an awm tawh,” tiin a sawi bawk.
Historical town Lahaina chu kangmei hian a kangchhe vek deuhthaw a, nung dama awm te chuan warning an hmuh miah loh thu an sawi bawk a.
Kangmei a nasat avang leh a tihchhiat a turu em avangin mihring ruang hmuh thil harsa tawp a nih thu an sawi a, ruang tam tak te chu a chhum bung rem rum tiin sawi a ni bawk a.
Mi 99 chu tute nge an nih kan hre thei tawh a, an fingerprint atanga kan hriat te an ni tiin Maui Police chief John Pelletier chuan a sawi a. Chhungte chin hriat loh nei te chuan an DNA sample pe turin ngenna an siam bawk.
Hei mai bakah hian kangmeiin a nuai hnu building tam tak chu nghet lo tak niin hei bakah hian toxic chemical boruaka leng bawk chuan chhanchhuah hnathawh a tikhaihlak tih a ni bawk a.
Mi 1,300 vel te chu an chin hriat lohin an awm mek a, phone communication te la bun fel hleih theih loh a nih avangin duh anga chakin hma a lak theih loh tih a ni bawk.
Hawaii-a nunna chan 99 tling tawh
