Govt. Hrangbana College chuan Mizoram University Annual Sports 2024-a an chak lawmna leh an college chhuak hmingthate chawimawina chu Thawhlehni khan an hmang a. Hrangbana College Alumni Association president, ZIDCO chairman JK Dawngzuala’n a hmanpui.
Champion lawmna leh Alumni mi hlawhtlingte chawimawinaah hian Hrangbana College aiawha MZU Sport-a tel zirlai infiammite hnenah chawimawina hlan niin, sports discipline hrang hranga titha ho chawimawina pek theuh an ni.
Hrangbana College zirtirtu leh zirlai hlui, Mizoram pum huapa hmingthate chawimawi an ni bawk a. Hetah hian an college founder principal, State Planning Board vice chairman ni mek Dr Kenneth Chawngliana; an lecturer hlui, cabinet minister ni mek Vanlalhlana bakah an college chhuak ho – State Legislative Assembly speaker ni mek Lalbiakzama; cabinet minister ni mek PC Vanlalruata; cabinet minister ni mek Lalrinpuii; cabinet minister ni mek Dr Vanlalthlana; State Assembly-a leader of opposition ni mek Lalchhandama Ralte; minister of state ni mek B Lalchhanzova; adviser to CM ni mek Lalmuanpuia Punte, MLA; MLA Lt.Col Lalhmingthanga; ZIDCO chairman JK Dawngzuala te hnenah chawimawina hlan a ni.
Championship lawmna kalzelah Govt Hrangbana College zirlai leh zirtirtute hian March 11 & 13 khan a mamawhte hman atan a thlawnin Civil Hospital Aizawl Blood Centre-ah thisen unit 224 an lo pe tawh a ni.
HBC-in hmingthate chawimawi
