Health care kalpui dan thenkhat thlak hlek dawn

State health care scheme kalpui dan chu a sum tumpuitu tur Asian Development Bank duhdan angin a kalphung her danglam hret a ni dawn.
Mizoram State Health Care Scheme Governing Body chu an chairman, chief minister Zoramthanga kaihhruaiin Thawhlehni khan an thukhawm a. Asian Development Bank (ADB) nen tangduna health care scheme changtlung zawk kalpui thuai a nih theihna’n thil pawimawh an rel. ADB-in Mizoram State Health Care Scheme changtlung zawk kalpuina tura phalna a pek tawh, a taka tihlawhtling tura tih tur tlem azawng la awm te sawiho a ni a. ADB-in duhdan a neih, tuna health care scheme kalpui mek dan atanga thlak hlek hlek ngaite chu thlak remtih an ni. He thawhdunna hnuaiah hian mi zawng zawng huap (universal health coverage) health care scheme changtlung leh bill theih zat sang tak chu cashless system hmanga kalpui tur a ni.
Hei bakah hian AB PMJAY tun sawrkar kum kal meka beneficiary thun belh ngai la awmte thunbelh remtih a ni a. AB PMJAY hnuai veka sawrkar hospital-te claim revenue pawh sawrkar hospital thuneitute remtihna angin tih danglam deuh a ni. Mizoram Health Care Scheme hnuaia computer engineer-te chu an hming informatics officer tia thlak a ni bawk. Health care scheme bill pek chhuah hmabak pawh sawi niin, heng bill pek hmabak hi sawrkar sum dinhmun azira a ranglama pek chhuah zel nise an ti.