Mizoram sawrkarin Universal Health Care Scheme chu a hmang tan dawn a, inziahluh tan theih niin, kumin May ralhma thleng inziahluh theih a ni. Mizoram Universal Health Care Scheme (MUHCS) hi Nilaini khan chief minister Lalduhoma’n a khuhhawng a. Health care scheme hmasaah damdawi in bill hi rei tak tak hren khawtlai thin a nih avangin damlote a tibuai a, damdawi in pawhin sum an dawn hma loh vangin an tlukchhiat phah lek lek thin a. Tuna scheme tharah chuan hetiang hi awm tawh lo tura beisei a ni tih a sawi.
Hemi atana sawrkarin senso a mamawh tur chu kum 5 kalta chhunga damlo neih zat enin, kum khata damdawi in lut dam lo tam ber tum, Covid len lai kha lak a ni a, chumi aia tam deuh tura beisei cheu a ni zawk a; sum sen tur pawh mamawh zat an chhutchhuah aia tam deuh dah a ni bawk tih chief minister hian a sawi a ni.
“Sawrkarin hriat lawk loh sum lama harsatna tawk ta se, damloten bill an pek theih dan tur ruahman lawk vek a ni a. Bank atangin pung awm loa pek theih tura ruahman a ni. Dinhmun chhe thei ang berh pawh awm mah ila, he scheme-ah hi chuan thlamuang takin a awm theih ang,” Lalduhoma hian a ti.
Damlo bill hi sawrkarin ni 30 chhunga peksak tura ruahman a ni a, hemi chhunga a pe hman lo a nih chuan sawrkar hian a pung awmin a rul a ngai dawn tih a sawi a. Sawrkar damdawi in leh empanelled damdawi ina hman tur a nih angin, sawrkar damdawi in pawh thuamthat vek tum niin, thawktu lak belh tum a ni tih a sawi a ni. Health care scheme tana sawrkar hmasa in ADB loan a lo buaipui chu a la fel hleithei loa, a kal kalin a lokal anga, lo la thei pawh nise he scheme tharah hian bilh luh tel mai tur a ni tih chief minister hian a sawi bawk.
Zawhna chhangin chief minister chuan, private hospital-te nen MUHCS an sawiho ngial a, la hman ve loh an titlu ta tih a sawi. “Tun hma lamah cheng vaibelchhe 4 chuang ngawt bat ral sak an ni tawh a, hun rei tak tak batsak an ni thin bawk. ZPM sawrkar min ring lo niloin, a tute pawh nise rin harsa an ti rih a ni. Reimbursement anga kal phawt a, a hnua cashless-a luh te pawh an rawt a; kan han kal anga, rintlak kan nih zia an hriat chuan empanel an la ni mai turah kan ngai,” a ti.
Chutihrualin kohhran damdawi in ho leh state pawn lam khawpui lian, Mizoram atanga kan pan tam hoah chuan MUHCS hi kalpui theih nghal a ni dawn tih a sawi.
Mizoram Universal Health Care Scheme chu:
8 2025 April 1 atanga hman tan tur niin, Mizoram khua leh tui diktak tana tih a ni.
8 Policy year hi sawrkar kum chhiar dan (financial year) mila kalpui a ni ang.
8 He scheme-ah hian AB PM-JAY, Mizoram State Health Care Scheme leh sawrkar MR bill dan chu huang khata chhunfin a ni, hamthatna dawn theih erawh a danglam thung.
8 Cashless-a kalpui tur a ni a, damdawi in luh ni leh chhuah ni inkara inenkawlna senso chu damloten an pek ngai loin, a thlawnin damdawi inah enkawlna an dawng thei ang.
8 Chhungkaw khatin kum khat chhunga an dawn theih dan tur chu – man chawia inziaklutte – nuai 5, AB PM-JAY – nuai 5, sawrkar hnathawk – unlimited, PE/MR – nuai 5, civil pensioners – category A-in nuai 12, category B-in nuai 5.
8 Inziahluh hun hi March kal mek atangin May thleng a ni. Inziaklut ve hman lo tan thla khat (July ah) chhung ‘khawngaihna hun’ hawn a ni anga, heta inziaklut te tan erawh late fee (a pangngai aia 50% a sang) chawi a ngai a, an inziahluh hmalam thlaa damdawi in inenkawlna an bill thei lo bawk ang.
Health Care Scheme thar hmang tan dawn
