Health department hi politics khelhna atan hruaitu thenkhatin lo hmang thin – Lalrinpuii

Health department hi politics khelhna
atan hruaitu thenkhatin lo hmang thin
– Lalrinpuii
Health & Family Welfare department chu tunhma in hruaitu thenkhatin politics khelhna atan an lo hman thin avangin siamrem ngai leh hmalakna tur mipui nghawng thil a tam hle tih minister Lalrinpuii chuan a sawi.
Siaha district tlawha thang ZPM hruaitu ni bawk Lalrinpuii hian Thawhlehnia Siaha ZPM office-a thu a sawinaah Health department chu department lian tak a ni a, tunhmain hruaitu thenkhatten politics khelhna atan an lo hman thin avangin department chhungah thil siamrem ngai leh hmalakna tur mipui nghawng thil a tam hle tih a sawi.
“Hmun thenkhatah Sub Centre, PHC, CHC kan enkawl zawh bak leh function theih si loh an lo siam duah mai a, chu chuan thawktu indaih lohna a thlen nasa hle. Kihhnawk tam tak min hnutchhiah a, kan thianfai mek a ni. Tunah hian District Hospital tin kan thuamchak mek a, an hmanraw mamawh pawh CSR leh IOC kaltlangin kan ngaihtuah a ni,” a ti.
Siaha district-in malsawmna thar a dawng dawn a, kalphung thar mipui sawrkarah he district hian kawng hrang hrangin hma a sawn mek tih minister hian a sawi bawk.
Siaha District Hospital a tlawhnaah Health minister chuan, district tina hospital-te thuamthat an ngaiin an veiawm hle tih a sawi a. Siaha District Hospital chu changtlung zawka siam bakah thawktu indaihlohna kawngah hma lak thuai a ni dawn tih a sawi.
Natna khirhkhan tak tak, Mizorama enkawl theih loh, sum tam tak senga hmundang pan ngai natna enkawl theih chu thlurbing an tum tih a sawi a. State Organ & Tissue Transplant Organisation (SOTO), Neuro surgery department hawn bakah Cardio Thoracic & Vascular Surgery leh In-vitro fertilisation (IVF) lamah tan lak an tum tih a sawi. Siaha District Hospital tan CT Scan an ruahman tawh a, medical officer dah belh tum niin, CSR sum atangin dialysis khawl 4 an ruahman sak tawh tih a sawi bawk.
Minister hian hospital a tlawh zawhin Nursing School building a tlawh a, sak zawh tawh si, luah theih loha ala awm chhan zirchiangin, contractor-te chu zo thuai turin a chah a; kumina luahluh theih tura peihfel turin a hrilh a ni.