Health & Family Welfare department chuan tunhnaia an department-a nawr mektu Chawngte, N Vanlaiphai leh Pangbalkawn khuate thil phut chungchang an sawifiah.
Chawngte:
Health department-ah thawktu leh hmanrua indaihlohna a nasa a. Hetiang karah hian sawrkar chuan duhsak takin Chawngte leh a chhehvel mipui tan hma lak a tum mek tih a sawi. Ambulance lei phalna dawn a ni tawh a, sawrkar kalphung angin lei tura buaipui mek a ni, tiin, ultrasound khawl chu National Health Mission hnuai atanga lei tura buaipui mek a ni tih a sawi.
Chawngte damdawi in tan health supervisor dil mekah health supervisor post-a kaisang tur engemawzat an awm a, an kaisan veleh Chawngte-ah hian dah tum a ni tih a sawi bawk.
Chawngte ‘C’ Sub Centre-ah Health & Wellness officer leh health worker pakhat ve ve an awm mek chungin, mipui an cover tam em avangin health worker pakhat dang dah belh tum a ni tih a sawi a. Chawngte CHC chu Mizoram CHC zingah sub divisional medical officer (SDMO) nei awmchhun niin, tunah doctor 4 – SDMO, medical officer (MBBS), dental surgeon leh medical officer (Ayush) an awm a; doctor nei tam zingah an tel tih a sawi.
Chawngte CHC ah hian x-ray khawl pahnih a awm a. Report dawn danin heng khawl pahnih hi a la hmantlak nia hriat a ni a. A dinhmun hi zirchian a nih hnuah a tul anga ngaihtuah a ni dawn tih a sawi a ni.
N. Vanlaiphai :
N. Vanlaiphai PHC ah National Ayush Mission (NAM) hnuaiah Ayush doctor post an neih loh avangin a thawk lai mek hi NAM hnuaia post awmna hmuna sawn a ni tih Health department chuan a sawi.
Pangbalkawn:
Pangbalkawn Health & Wellness Centre hnuaiah hian health & wellness officer 1 leh health worker 2 an awm thin a. Hetih lai hian Darlak khuaah health worker an awm loh avangin Pangbalkawn Health & Wellness Centre atangin health worker 1 chu Darlakah sawn a ni.
Health department nawrtute hrilhfiah
