Health minister hovin Nightingale Awards dawngtu H. Mankimi lawmpui
Nursing lama thawk tha, National Florence Nightingale Awards 2024 dawngtu H. Mankimi lawmpuina hun chu nimin khan health & family welfare minister Lalrinpuii hovin a pisa-ah neih a ni.
H. Mankimi hi ward superintendent (Rtd.), Serchhip IOC veng a ni a, 2024-a India ram puma he award dawng tura thlan chhuah nurse 15 zingah a tel a, award a dawn chhan hi Maternal & Child (Nu leh Naute) nunna chhan nana a thawh hlawk vang a ni. Award hi India President Droupadi Murmu chuan September ni 11, 2024 khan a chenna Rashtrapati Bhavan-ah a hlan a ni.
Health minister Lalrinpuii chuan nurse thawk tha chawimawina ngaihhlut hlawh tak National National Florence Award, Mizoram atanga dawngtu H. Mankimi a lawmpui thu sawiin, a inpekna leh hnathawh ropui takte chu midangte’n entawn se a duh thu a sawi a. Nurse tha chherchhuah kawngah tanlak a pawimawh thu sawiin, nunna an kutah thui tak a innghah tlat avangin mawhphurhnate rinawm leh taima taka hlen chhuah zel a tul thu a sawi a. Mizoram health care tihmingmawitu pawimawh tak nurse-te chu damlo anmahni pantute tana dawr nuam leh hawihhawm nih tum turin a chah a ni.
H. Mankimi pawhin health minister-in lawmpuina a buatsaih avangin lawmthu a sawi a. A hnathawh chhunga nu leh naute dinhmun a ngaihpawimawh thin dante leh rinawm taka hna a thawh thin dante a tarlang a. Amah ang bawka nurse hna thawkte chu an rawngbawlna ngaipawimawh tur leh inpekna nena theihtawp chhuah thin turin a sawm a ni.
Florence Nightingale Award hi kum1973 atang khan Ministry of Health & Family Welfare, Government of India chuan a pe tan a. Kum 1983 thleng khan chhunzawm niin hemi hun chhung hian Mizoram atangin mi 4-in an dawng hman a ni. Rokhawlhna avanga kum 20 chuang tawpsan a nih hnuah 2007 atang khan vawiin thlengin kum tin he chawimawina hi pek chhunzawm a ni a, Mizoram atangin mi 12-in an dawn belh ve leh a, tihian Mizoram atangin mi 16 te’n National Florence Nightingale Award hi an dawng tawh a ni.
H. Mankimi hian kum 1986 khan GNM Durtlang Hospital atangin Nurse hna a zir zo a, Durtlang Hospital-ah kum thum a thawh hnuah September ni 7, 1991 khan Sawrkarah a lut a. March ni 5, 2023 khan Serchhip District Hospital-ah Ward Superintendent-ah a kaisang a, kumin March khan he hna atang hian superanuation pension-in a chhuak a ni.
Health minister hovin Nightingale Awards dawngtu H. Mankimi lawmpui
