PC Laldinthara
Armed Veng
Sorkar thar a lo piang a Healthcare bill an pe hi a lawmawm khawp mai. Sorkar chungah pawh lawmthu sawi tur kan ni. Hetih rual hian Sorkar hmasa kha Healthcare bill pe miah lo, ba char char angtein thenkhat chuan kan chhuah a. Keimah ngei pawh hian COVID hri len vangin sum a indaih lo a ni ang tiin ka lo sawi ve thin. Mahse tun hnu hian kan chhui chianga, healthcare bill hi kum tin an lo pe thin tih ka hre chauh a ni. Hetiang hi an pek dan a ni. 2018-19 khan 20.1crores pek a ni a. 2019-2020 ah 62crores, 2020-2021 ah 28.34crores, 2021-2022 ah 27.84crores, 2022-2023 ah 34.34crores leh 2023-2024 ah 43crores pek a nia, a vaiin Rs. Vaibelchhe 215.62 (cheng nuai 21,562) a lo pe reng chu niin, Sorkar hmasa khan 2023-24 kum tawp lamah 60crores pek turin a finance dept. ah tifel hmanin, 35crores a sem hman a, tihfel vek tawh kha Sorkar tharin a rawn sem zui ta a nih ber chu.
COVID hri leng karah hetiang taka Healthcare bill a lo sem hi zoram mipuite hriat loh turah ka ui deuh a ka rawn thai lang a ni e.
MAK LEH DEUH CHU
Mak ka tih deuh, Ka rilrua awm leh pakhat ka ziak tel leh teh ang. COVID laia Central atanga Mizoram sum hmuh loh RTI atanga zawhna, chhanna inang lo thei hi a ni. Ni 19.8.2022 a pu J Lalramnghaka, Bethlehem vengthlang, Kawn veng, RTI zawhna chu, RTI hmangin chhan a nia, Rs. 2632.58crores tih a ni a. Sorkar thar alo pianga, ni 12.3.2024 Assembly second session a CM chhannaah erawh Rs. 2,370.80crores chauh a ni leh ta si. RTI chhanna hmasaah khan Financial year 2021-2022 1st quarter thleng chauh chhangin, chumi awmzia chu 2021 June thla thleng chauh chhangin Rs. 125.46crores niin, hei hi ni 12.3.2024 Assembly second session a CM chhannah a tel ve ta lo a ni. Dik tak chuan mipuiin kan hre theuh anga, 2021-2022 kha chu COVID HRIPUI len zual lai ber a nia, Central atanga sum kan hmuh loh RTI chhanna hmasa a tel si, Assembly Session a CM chhannaa a tel ta lo leh sum hmuh loh Rs. 2632.58crores atanga Rs. 2,370.80crores a a tlahniam ta dawrh hi mak ka ti lo thei lo a ni. 2021-2022 laia COVID HRI len nasatzia leh India ram buai zia, MP Fund thlenga suspend hial a nih laia, CENTRAL SORKAR atanga sum hmuh lo, a hmaa ziah lan si, a hnua awm ta hi rin phak baka mak a ni. Ka lo rin dan tak chuan 2021-2022 June thla thleng chauha sum hmuh loh RTI chhannaa ziah lan hi, June, 2021 hnu hian sum hmuh loh hi a awm nual ka lo ring zawk hial a ni. Lo ngaihtuah ve teh u.