Healthy Campaign atan sumin pui dawn
Healthy Lunglei District Campaign hnuaia hriselna kawnga hmalakna kalpui mekah Lunglei district bawrhsap pisa-in RailTel Corporation of India Limited New Delhi atanga corporate social responsibility (CSR) kaltlanga tanpuina sum a hai chhuah hlawhtlinna atan Thawhlehni khan inremna thuthlung (MoU) an ziak a. Bawrhsap R Lalthazuala leh RailTel Corporation executive director (CC) Harish Pawaria ten hming an ziah hnan.
Bawrhsap chuan Healthy Lunglei District Campaign hnuaia khua leh tuite hriselna dinhmun endik leh hriselna lam inzirtirna beihpui thlak mek atana RailTel Corporation-in CSR kaltlanga tanpuina an pe tur chu lawmawm a tih thu a sawi a. Campaign hi kumin June atang khan kalpui niin, district chhung thingtlang khaw kilkhawr zawkte hrut chhuak turin endikna hmanrua (test kit) leh chetvelnaah sum mamawh a sang a, pawnlam atanga tanpuina awm theite an dap tih a sawi.
RailTel Corporation hi sawrkar laipui hnuaia Navratna central public sector enterprise (CPSE) pakhat niin, khawl hmanga ralkhata inbiak leh inthlunzawm lama India ram puma rel kawng, khawpui leh thingtlangah inzar pharha hma latu an ni. MoU ziah tak ang chuan, Healthy Lunglei District Campaign atan hian RailTel Corporation hian CSR kaltlangin Lunglei DC office-ah cheng nuai 18.92 a pe dawn a. Tanpuina sum an pek tur hi tum 4-a pek tlak tum niin, tum khatah cheng nuai 4.73 zelin an pe dawn a ni.
Healthy Campaign atan sumin pui dawn
