Healthy Lunglei campaign kalpui zel

District Health Society Lunglei hmalakna, Healthy Lunglei District Campaign hnuaiah Thawhtanni khan Lungleiah office pali – Lunglei Municipal Council, District Transport Office, Urban Development & Poverty Alleviation leh Local Administration Department thawktute tan natna inkai chhawn theih loh – non-communicable disease (NCD) chungchang inzirtir pahin an hriselna dinhmun ensak an ni
Lunglei addl DC James Miahlung chuan Healthy Lunglei District campaign kalpui tawh dan a sawi a. Mizoramah NCD natna hrang hrang – BP sang, zunthlum, cancer leh a dangte a hluar thu leh sawrkar hnathawkte pawh a tihbuai thu sawiin, heng natna hian ei leh in leh nunphungah harsatna a thlen bakah inenkawl nan sum tam tak sen a ngai thin, tiin, vei lo turin nunphung uluk leh mahni inenkawl that a pawimawh tih a sawi a ni.
Civil Hospital Lungleia medical officer Dr Rinmuana chuan NCD awmzia sawifiahin, NCD natna lanchhuah dan leh natna awm chhan bakah NCD natna laka inven dan tur a zirtir a. Zawhna awmte chhan niin, hun hman zawhah office palia thawktute hriselna dinhmun hi Health department-a thawktuten an ensak a ni.