Healthy Lunglei District Campaign

Healthy Lunglei District Campaign
Nimin khan Lunglei District Bawrhsap Pi Navneet Mann hovin Lunglei DC Conference Hall-ah Healthy Lunglei District Campaign hnuaia inkai chhawn theih loh natna (non-communicable disease) laka him nana inzirtirna beihpui thlak mek thlir ho niin, hma lak zui zel dan tur sawi ho a ni.
He hunah hian Deputy Commissioner office, Health & Family Welfare leh Information & Public Relations official-te leh Mizoram thalai Kristian Pawl (M|KP) Secretary te an tel a. Sub-Deputy Commissioner Lalhlimpuii Pachuau, District Immunisation Officer Dr Christina Zonunmawii leh M|KP Secretary Rev. F. Zorinkhuma te’n Healthy Lunglei District Campaign hnuaia hmun hrang hranga hriselna endikna leh inzirtirna kalpui dan report an pe a. Healthy Lunglei District Campaign-in a rah chhuahte sawi ho niin, hma lak zel dan tura rawtna hrang hrang sawi ho a ni bawk.
District Bawrhsap Pi Navneet Mann chuan nikum June thlaa Healthy Lunglei District Campaign kalpui a nih at anga hriselna lama a rah chhuah hmasawnna lo lang chu lawmawm a tih thu sawiin, he campaign hnuaia hmun hrang hranga NCD endikna atangin mahni thua inentir nachang hre lote leh mahni dinhmun inhre lo tam takin an dinhmun an hriat chian phah te, ei leh in leh nunphung hrisel inzirtirna nasa taka kalpui a ni te chuan a tha zawngin rah a chhuah ngei a beisei thu a sawi a. He campaign zara NCD natna chungchanga Lunglei District dinhmun tlangpui hriat theih a ni ta chuan hma lak zelna turah pawh kawng hmang nei zawka ruahmanna siam a tisam dawn a ni, a ti.
Healthy Lunglei District Campaign hi Lunglei District-in hriselna lama hma a sawn theih nana ruahman niin, June ni 12, 2024 khan Health Minister Lalrinpuii’n a hawng a. He campaign hnuaiah hian Lunglei khawpui chhungah natna inkai chhawn theih loh, non-communicable disease (NCD) chungchang inzirtirna leh hriselna dinhmun endikna (screening) buatsaih thin a ni a. M|KP nen tang kawpin nikum December thla atang khan Lunglei khawpui chhungah pilot project kalpui ni bawkin, khawpui chhunga pastor bial |KP pathum – Bazarveng, Rahsiveng leh Theiriat bial leh an hnuaia unit 14 te nen kawng hrang hranga hriselna lam hawi inzirtirna leh puanzarna leh member-te hriselna atana hma lakna hrang hrangte kalpui a ni bawk.
Healthy Lunglei District Campaign hi Lungleia MLA thahnem ngaite sum pek leh DC office atanga a tul anga sum sih chhuah bakah, health programme leh department dang programme hrang hrang nena kai kawpa kalpui chhoh niin, he campaign kalpui zelna atan hian nikum October thla khan Lunglei Deputy Commissioner office chuan RailTel Corporation of India Limited, New Delhi te nen Corporate Social Responsibility (CSR) kal tlanga tanpuina sum Rs nuai 18.92 hmuhna tur inremna thuthlung (memorandum of understanding) an ziak a. tanpuina sum hi tum khatah Rs nuai 4.73 zela tum lia pek tlak tura ruahman niin, 1st instalment dawn tawh a ni a. Hemi hmang hian campaign hi ngawrh taka kalpui chhoh mek a ni.