Lung (heart) natna leh heart attack hi hmeichia-ah hriatchhuah mai a ni lo fo niin mithiam ten an sawi a, a chhan pawh hmeichhiaa heart attack lanchhuah dan hi mipaa a lan chhuah dan nen a inan loh vang niin an sawi. Tun tumah hian Times of India health section-in hmeichhe tana heart attack sign hriat tur pawimawh ni a an tarlan te kan rawn chhuah chhawng e.
Hmeichhia heart attack nei 70% aia tam zawk mah chuan heart attack an neih hma thla khat velah chau leh zawi deuh ngawih ngawihin an awm niin an sawi. Hei hi an ngaihthah tlangpui a, in chhunga an chet velna leh an hnathawh vang te niin an ngai mai thin. Chuvangin i chet nasat emaw hnathawh nasat emaw chhuanlam tur awm si lo va chau leh zawi deuh ngawih ngawiha i awm chuan heart attack tur intham a ni thei tih hriain doctor i rawn dawn nia.
Zan mut theih loh (insomnia) pawh an nei tel thin. Hmeichhe heart attack nei ten an neih hma thla khat velah a chhan hriat tur awm mang si loin zan mut theih loh an nei tlangpui niin an sawi.
Stress hi heart attack risk tisangtu a ni. Hmeichhia ten heart attack an neih hmain rilru hrehawmna an nei duh hle a, a chhan sawi tur awm si lova hlauhthawnna an nei a, rilru hrehawmna te an nei thin.
Pum nuam lo, luak chhuak ti deuh nghulh leh digestion lama harsatna te an nei thin. Hei hi hmeichhe heart attack patient ten an report tlanglawn tak a ni.
Thawchham lek lek ten an awm fo. Hah vang emaw exercise lak vang emaw pawh ni chuang loin thaw hah an nei duh hle a, step kal hlekin an thawk a hah zung zung a, an nitin hnathawh thin pangngai an tih pawhin an thawk a hah hma riau thin.
A chhan sawi tur awm si lo va thlan chhuak, luhai deuh leh chau deuh ang ten an awm a, hritlang tur emaw te an inti thin a, mahse, heart attack tur intham a lo ni si.
Hmeichhia heart attack nei tam tak chuan an khabe ruh leh nghawng vel na an nei thin a, a chang chuan an beng leh dar (shoulder) te pawh a na thin a, an ban, a bik takin ban veilam na te pawh an nei thin.
A chunga tarlan symptom te hi i nei a nih chuan doctor i rawn thuai dawn nia.
Heart attack sign- hmeichhe tana hriat ngei chi
