US sipai 100 chuang chuan Nigeria thlengin African khawthlang rama sipaite hi hi Islamist hel leh hel pawl dang beih leh chhui hna an thawhnaah an puiin zirtirna an pe dawn.
Sipai leh an hmaruate hi hmarchhak state, Bauchi-ah an lut tih Nigerian defence thupuangtu, Maj Gen Samaila Uba chuan a sawi.
US sipaite hi ral beihnaah an tel ve dawn lo va, sorkarin a ngen angin an ramah puitu turin an kal tih a sawi.
US hian Krismas ni tak khan Nogeria hmarthlanga Islamist helhote camp pahnih beiin tuna sipai an tir lut leh hian ram pahnihte inkara sipai thawhhona a tilang.
Sorkar hian Islamist hel pawl hrang hrang – Boko Haram, Islamic State in West Africa Province (Iswap) leh pawl dangte an beihnaa pui tur hian an ngen a ni.
Nigeria hian Islamist helho telin venhimnaah chona lian tak a hmachhawn mek a, mi sual pawl, ‘bandit’ tia an sawiten mi an rawkin tlanna sum phut nan mi an ru reng bawk a, ram inchuhna avanga buaina a awm reng bawk.
“Thawhhona hian firfiakte hlauhawm theihnaah leh hnam dinhmun derthawngte venhimna kawngah Nigeria chu technical thilah a pui dawn a ni,” tiin Maj Gen Uba chuan thu a chhuah.
US-in sipai an dahna tur hian Nigerian leh US defence thuneitute an indawr niin a sawi.
US Africa Command chuan tun thla tir khan American sipai tlem an awm mek tawh tih a lo sawi tawh a. Nigerian sipai thuneitute chuan 200 velin an belh leh dawn tih an sawi bawk.
Nikum khan US President Donald Trump-a sorkar chuan Kristiante himna pe thei lovah Nigerian sorkar hi a puh a, an himna atana hma nasa zawka la turin a lo ti tawh.
Trump-a hian he mi hma pawh hian Nigeria-ah hian ‘Kristiante suatna’ kalpui mek a ni tih a lo sawi tawh bawk a; mahse, Nigerian sorkar chuan beihna tawkte hi Muslim, Kristian leh sakhaw nei lo thlengin an nih zawk thu a sawi thung.
Nigerian sorkar hian US hnenah hian a puih avang leh December 25-a hmarthlang, Sokoto state-a Islamist hel pawl, Lakurawa an kah kha lawm thu hrilhin President Bola Tinubu-a pawhin bei tur hian a pawmpui thlak niin an sawi.
Nigeria-ah hian hnam 250 chuang awmin hmar lamah Muslim leh chhim lamah Kristian an awm a, a lai velah hian ram inchuhin an intithiam lo reng a ni.
Hel beihnaa Nigeria sipaite pui turin US sipaite thleng
