Heroin man hnem, Mizoram pawna mi tur tam

Mizoramah heroin a hluar a, man pawh an man nasa.
Mahse Mizorama an man hi Mizoram pawna mi tur a lo ni deuh zel tia sawi theih a ni.
Mizoram Excise & Narctotics (MEN) department-in kuminah heroin hi quintal chanve chuang an man tawh a, hei hi awihawm loh khawpa tam a ni. An heroin manah hian a tam zawk chu Mizoram pawna mi tur a ni tih an sawi.
MEN department hotute chuan thla hnih thla thum kal ta atang khan a hlawm liana an man hnem thu an sawi a, a hlawm lian an man hi Mizoram pawna mi tur a lo ni zel tih an sawi bawk.
An mi mante’n an heroin kawl chu Silchar leh Tripura panpui tur a nih thu an sawi tlangpui tih an sawi a, chuta tang chuan hmun dangah an kalpui leh thin nia an hriat thu an sawi.
Mizoramah heroin ti hi an tam a, mahse tun hnaia Mizorama an man hi Mizorama mi tur ni lovin hmun danga mi tur a nih thin avangin, Mizoramah ‘demand’ a sang uak uak tihna nia a lan loh thu an sawi.
2015 kum tluana MEN department-in heroin an man kha kg 4.088 a ni a, kha kha kum khat chhunga kg 4 an man tlin vawi khatna a ni. A hun laiin kg 4 hian tam tih a hlawh a, tunah chuan kg 4 te hi chu vawi khatah an man fo. Tun hnaiah kg 4 te, kg 5 te, kg 6 te an man fo.
MEN department hotute chuan heroin tam thama an mante hi hnam dang kut atanga an man a tam thu leh, Mizo kut atanga an man pawh hnam dang ta tur a nih fur thu te an sawi. Hnam dangin Mizorama an rawn lak a awm a, Mizovin state pawna an dah a awm bawk.
“Mizoram hi a kalkawng kan ni a. Hei hi tun hma atanga kan hriat sa a ni a, tun hnaiah a ni zual niin kan hria,” MEN department hotu pakhat chuan a ti.