Hezbollah in an pawl
hruaitu thar puang
Israel in an laka beihpui an thlak hnuah Hezbollah pawl hruaitu lawk tak tak tihhlum an ni tawh a, hei vang hian Hezbollah chuan an pawl deputy secretary general ni lai chu an hotu thar a nih thu an puang.
He an hruaitu thar hi Naim Qassem niin, anni hian hun rei tak chhung hruaitu lo ni tawh Hassan Nasrallah a thlak dawn a ni. Ani hi thla hmasaa Israel in thlawhtheihna hmanga Beirut a beih tum khan a boral nia sawi a ni.
Israel in Hezabollah hruaitu lawk tak takte tihlum nual tawhin, an awmna hmun apiangah a zawng hmu thei hle a, Qassem hi hruaitu lawk tlemte la dam zinga mi niin, an pawl chanchin leh hmalakna tur hre ril pawl tak a ni bawk.
Qassem hi an pawl hrechiang bertu, hruaitu lawk la dam tlemte zinga mi niin, Shura Council (an pawl rorelna sang) chuan an hotuah a thlang a, a awmna erawh a chiang lo thung.
Report thenkhat chuan Hezbollah hruaitu thar hi Iran-ah a tlanchhia niin an sawi a, Iran hi Hezbollah thlawptu langsar tak a nih avangin a dik ringtu pawh an tam hle. Hruaitu thar a nih thu puan a nih hnu hian Hezbollah chuan an ke pen tidik tura malsawmna hmahruai a nih thu an sawi.
Hetihlai hian hel pawl lamin hruaitu thar an puan hnu lawkah Israel defence minister Yoav Gallant chuan hun engemawti chhung atana hruaitu an ruat mai a nih thu leh, a daih rei dawn loh thu a sawi ve thung.
Hezbollah in an pawl hruaitu thar puang
