Hezbollah-in Israel leh Lebanon inkahhai thuthlung hnawl

Lebanese ralthuam keng pawl, Hezbollah chuan US-in a thlawp, Israel leh Lebanon inkahhai thuthlungte chu an hnawl.
Thuchhuah na tak tak siamin Iranian thlawp pawl hruaitu, Naim Qassem-a chuan inbiakna chu Lebanon tana ‘hlawk lo’ leh ‘mualphothlak’ tih a sawi a, ‘Lebanese tam zawk pawhin’ chiang takin an hnawl niin a sawi.
Israel leh Lebanon ten inkahhai derthawng tak an siam pawh sei a nih rualin Lebanon chhungah Hezbollah awm phal lohna ‘pilot’ security zone siam a ni dawn tih an puan hnuah an hnawl thu hi an sawi a ni.
US State Department-in Nilainia thuchhuah an siamah ram pathumte chuan inremna hi ‘Hezbollah-in silai an hmeh puah a tawp vekna turin’ lungrual takin an pawm tih a tar lang.
Ningani khan inbiaknaa tel ve lo Hezbollah hruaitu chuan chhang zuiin ‘inkahhai’ nia sawi chu Hezbollah-in silai an hmeh puah loh leh Israel nena an indona hmun, chhim lam atanga an fighter-te hnuh kir chu inpekna leh Israel thil tum tihhlawhtlinna a nih thu a sawi.
Beirut khawpui chhim lama Hezbollah kulhpui, Dahieh tia hriat bawkah pawh hetiang ngaihdan hi a awm mek bawk.
Israel leh Lebanon inremna hi Washington-a US-in inbiakna vawi lina a huaihawt hnua siam a ni a, Israel ramri leh Litani lui inkar, hmar lam km 30 vela hla, tunah hian Israel sipaiten an luah mek atanga ‘Hezbollah zawng zawngte chhuahtir’ tih a awm tel.
Inremna ang chuan US-in ‘pilot zone siamna kawngah a pui dawn a, Lebanese Armed Forces-in sorkar hnuaia mite ni lo zawng zawngte tel lova an ram chu a thunun theihna tur a ni’ tih a ni.
Pilot zone-te awmna tur hmun tarl anna map engmah a tel lo va, a taka an hnathawh theih dan tur sawi fiahna a awm lo bawk.
Inremna hi Thawhtannia inkahhai pawh sei hnua tih a ni a, Hezbollah-in Israel a beih loh nan chuan Israel-in Lebanese khawpui, Beirut-a bomb chu a insum dawn a ni.
Ram pahnih aiawhte hi June 22 hian an inhmu leh dawn a, ‘inremna kimchang siam tumna nen’ an inbe leh ang.
Inbiaknaa palai, US chuan Israel leh Lebanon inkara inremna hian Iran nena an inkara inbiakna kal mek a tihchak a beisei a. Iran hian Washington nena inremna an siam turah chuan Lebanon-ah pawh remna a awm tel a phut tlat a ni.
Lebanon hi March 2 atang khan US, Israel leh Iran indonaah a tel ve tan a. Hezbollah hi Israel-in Iran sipreme leader an that avangin phuba lak nan rocket-in Israel a kap a. Israel hian Lebanon ram pumah thlawhna hmanga beihpui thlakna leh chhim lamah khawmualah beihpui thlakin a chhang let a ni.
April 16-a Israel leh Lebanon inkara US-in inkahhai a siamin indo hi a titawp thei lo va, kar hmasa khan Prime Minister Benjamin Netanyahu-a chuan a sipaite chu drone leh rocket hmanga Israel hmar lama chengte beih an nih avangin Hezbollah beihna nasa zawk leh Lebanon ram thuk zawka lut turin a hriattir a ni.
Lebanon-ah hian indona a chhuah atang mi 3,526 an thi tawh niin an ram health ministry chuan a tar lang a. Israel pawhin ramri lehlamah an sipai 26 leh Israeli civil mi pali an thi tawh tih an sawi ve bawk.