Bawngkawn leh Durtlang Leitan inkar kawngpui kama hmalakna kal mek tihtawpna thupek chu Gauhati High Court Aizawl Bench chuan 2024 July 18 khan a tichhuak.
High Court order hian, Bawngkawn leh Durtlang Leitan inkar kawngpui huamchhunga in sak hna kal mek, in sakna tura lei laih mek leh kawngpui kama petrol pump sakna tura kutthlakte a huam vek a. Chutih rualin, helai vela leimin tur venna atana hnathawh – retaining wall siam adt. a huam lo thung.
Hemi chungchangah hian Aizawl Municipal commissioner, deputy commissioner leh SP Aizawl te chu thil awm dan thlithlai zui a, chawlhkar hnih chhunga court hnena report pe turin a ti bawk.
High Court order-a a lan dan chuan, he case hi suo moto notice-a kalpui a nih rualin, INTACH (Mizoram Chapter) convener hnen atangin Bawngkawn leh Durtlang Leitan inkar kawngpui dunga harsatna thlen dan hi court chuan ziakin a dawng a. INTACH hi petioner-ah dahin, respondents-ah chief secretary; secretaries of Land Revenue& Settlement, UD&PA, Home; DC Aizawl; SP Aizawl leh Aizawl Municipal commissioner te dah an ni.
Suo moto hmanga he case hi kalpui a ngaih chhan chu, Bawngkawn leh Durtlang Leitan inkar kawngpuia harsatna hrang hrang a thlen hnuah pawh state sawrkar leh AMC-in hma an lak mai loh avangte, mipui tawrhna a thlen mek avang leh mimal hamthatna aia mipui hamthatna chu a buk a rih zawk avanga court chu inrawlh ta mai a nih thu order-ah hian tarlan a ni.
Hemi chungchang hi court chuan kumin August 1 hian a ngaihtuah leh dawn a ni.
High Court-in Durtlang kawnga hmalakna tihtawpna thu chhuah
