High Court-in kuhva tawlhruk
thubuai a ngaihtuah tan hnai
Myanmar atanga Champhai district kaltlanga kuhva ro tawlhruk thubuai chu Gauhati High Court chuan a ngaihtuah tan dawn a. He thubuaiah hian Mizo leh hnamdang 21 chu inhnamhnawiha puh (accused) zingah an tel.
Social activist Vanramchhuangi chuan kum 2022 khan Gauhati High Court Aizawl Bench-ah dan loa kuhva tawlh chungchangah public interest litigation (PIL) thehlutin, Central Bureau of Investigation (CBI) chhui tir turin a dil a. A dil angin High Court hian CBI chhui turin thu a tichhuak a ni.
CBI hian High Court thupek chhuah atanga reiloteah kuhva tawlhruk hi an chhui nghal a. 2021 January 1 atanga 2024 March 31 inkar an chhui a, kumin August 29 khan chargesheet an thehlut.
CBI chhuina atang chuan he an chhui chhunga kuhva tawlhruka sum virvel hi cheng vaibelchhe 1022.25 vel niin, dan dik taka lakluh ni ta se, chhiah an chawi tur, chhiah awlruk ni ta si hi cheng vbch. 408.32 chuang niin an chhut.
CBI-in High Court-a chargesheet a thehluh tawh angin, court hian November 10 khan chargesheet copy hi PIL thehluttu, he thubuaia inhnamhnawiha puhte a pe a. Chargesheet-ah hian dan bawhchhiaa kuhva tawlhruah mi 21 puh (accused) an ni a, mi pakhat a tlanbo a, mi 17 court-hma ah an inlan nghal. Ukil la ruai ve lo leh court-a inlan lo mi pathum an la awm avangin document inhlan (delivery of documents) hi a la zo loa, a zawh veleh thubuai hi ngaihtuah tan a ni tawh dawn tih sawi a ni.
High Court-in kuhva tawlhruk thubuai a ngaihtuah tan hnai
