Dr. Lalsiamhnuna
Kan rama Zirna In Sang, Higher Secondary School leh College (Pawl 12 leh a chung lam zirna) hi mi tinin kan vei ta emaw ni chu aw tih tur khawpin kan sawi nasa a, a lawmawm khawp mai. Kan vei dan erawh chuan ram pum huap, sawt tlanna tur thleng ngei se. Tun hnaia Govt. Champhai College mamawh Zirtirtu ngiata MZP te hmalakna kha a hlawhtling dawn niin a lang a, an lawmpuiawm khawp mai. Chutih rualin, intihhmuh chi a ni lo tawp tih erawh hriat a tha. Mahni khua/veng/district bil ang zawnga kan kal vak chuan kan inpawt pherh vak ang a, ram pum zirnain a tuar thei dawn tlat.
Kan ram hruaitute hian Zirna Siam that an duh a, an hun lai theuhvah a changtu Minister te (Schhool Education leh Higher & Technical Education a mite) pawhin tan an la viau thin. Hma pawh kan sawn ve zel a, duh thu erawh a la sam hlei thei meuh lo thung. Chutih rualin, tunlai hian thil lawmawm deuh mai chu- Khawpui leh thingtlang college-te rualkhai zawka kal tir duhna avanga, zirtirtu (Principal/Professor/Asociate Professor/Assistant Professor/Lecturer)- te College/School hrang hrangah mamawhtute mamawh dan mila sem rual ni se, tia thutlukna, tun hmaa an lo siam tawh thin, an kalpui hleih theih tawh loh thin chu, tunah hian tihhlawhtlin ngei tuma chak taka hmalakna awm hi a ni. Kalphung Thar duh Sawrkar leh a changtu Minister chak leh huaisen kan neih vang a ni ngei ang.
Zirtirtu semrual (tum) hian nghawng a nei na duh hle thin. Tlem lai deuh khan, ‘zirtirtu sawn chhuah an phal lo,… an dang…’ tih thawm a awm thin. RUSA Scheme hnuaia zirtirtu atana an lak leh mamawh hmanhmawhna avanga an lak chawp nawk nawk, zirtirtu la thalai deuh, thiam tak tak si te kha, a ngheta lak an nih dawn chuan post ruakah ngei dah an ngai tawh si a, an lo thawh mekna college, theihtawp an lo chhuah tawhna kha an rilruah a lo bei nghet hman a, an zirlai-naupangte lahin an lo taneih hman tawh thin bawk nen, chhuahsan mai an harsat thin a ni. A awm viau. Zirtirtu, mahni thawhna zirlaiten an chhuak tur an ui ngawih ngawih chuan thil lawmawm tak a ni a, ‘chhuak thuai thuai se’ an ti ang tih hi hlauh zek zek tur a ni. Chutih rualin, kan hotute thu awih phawt mai hi, zirlaite leh a nghawng mek college tan mai ni lo, kan ram pumpui kal zelna atan a pawimawh ngawih ngawih. Siamthatna hna thawh tak tak dawn chuan, vawikhata vawikhat chu rik laih hi a awm lo thei lo. Chu chu sut tlang ngei ngei tur a ni. Sut tlang loh chuan ‘a zual zawpui vailen hlo’ tih ang kha a ni mai. Tih tharleh dawn pawhin a hma aiin a har sawt a, siam that a khirh zual sauh tawh thin.
Tlem lai deuh khan, kan ram hruaitute zingah ‘a ngaihna hria’ tih tawngkam hi a lar viau thin a, dik kan ti a, kan lawm viau thin a nih kha. Tunah erawh chuan, a ngaihna hriat ringawt a tawk tawh lo. A taka kalpui a ngai tawh. Thil, a tha zawnga kalpui tak tak tur erawh chuan huaisen a ngai khawp mai. Tun hma hlek khan, kan H&TE hotuten ‘Zirtirtu sem rual /inkal thelh/inthlak kual dan (Teacher- rationalization/Teacher- exchange Programme)’ tha deuh mai an rawn duang chhuak a, a lawmawm tawh teh reng nen, tute emaw he policy duh lotu emaw, awm hmun sawn huphurhtu emaw te boruak rit, tawn tlang huphurh vang ni maw, an titlang ngam ta lova, a uiawm khawp mai.
College-a thawktu zawng zawng deuhthaw ten khawpuia luh an duh a, luh hram dan tur an dap char char a, post ruak- pension hnai leh vanduaina (thihna) tawk an awm hlek chuan chung mite chhuahsan hmun ruak chu chan ngei tumin an kher ngar ngara, inchuh buai, inhmu thiam lote pawh an awm hial thin. Hengte avang hian, khawpui college-ah chuan post ruak a awm hman meuh lo. An chhuahsan college, a bikin, thingtlang college-a post ruakte erawh chuan ngaihsak an hlawh nep khawp mai. Post ruak an nei deuh reng thin. Khawpui college-a thawk, thingtlang college-a sawn chhuah te chuan hrem tuar ang hiala an inngaih laiin, thingtlang atanga khawpui lut thei te erawh chuan promotion hmu ta ang hialah an inngai thung; mi pawhin an ngai tlangpui. Mak deuh mai chu, zirtirtu thingtlanga awmte hian khawpuia an luh theihna tur a nih dawn phawt chuan eng chhuanlam pawh siam an hreh lo a ang. Hmeichhia, pasal nei tawhte pawhin an chhuahsan tawh an nu leh pate damlohna/harsatna chhuanlamah zu hmang duha maw le. Sut tlang ngai chu a chiang khawp mai.
Zirna siam that nana kan ram mamawh ber nia ka hriat tak chu: Ram tana tha turah chuan, kan ram roreltute hian, tlak phah thak dawn pawh ni se, dodalna nasa tak karah pawh, huaisen takin kalpui hmiah hmiah rawh se. Ram an hmangaih tak zet chuan an la lawm zawk tho tho vang. NGO/MCTA/MZP/MSU,etc. te pawhin chutiang kawngah chuan sawrkar thlawpin an kut tihchak tum bawk ila, kan thlawp thei ngang lo a nih pawhin, dodal lo tal ila, hma kan va sawn rua e.