Himalaya-a vur tawlhah pathum thi, pali dang zawng mek
Nepal hmarchhaka Himalaya tlang chhipa vur tawlhin a chhilh avangin French leh Nepalese pahnih an thi tih police-in an sawi.
He thil hi Thawhtanni zing dar 09:00 (India-a zing dar 08:45) vela Dolakha district-a Yalung Ri tlang base camp bula thleng a ni.
Tlang lawn dang pali, Italian pahnih, German leh Canadian te pawh an thih a rinawm hle a, zawn mek an ni a, an chin an la hre lo va. An zavai hian tlang lawn leh anmahni hruaitu, tual chhung mi niin 12 an ni a, vur tlawhin a nan hma darkar khat vela chhuak an ni tih district police chief-in a sawi.
Base camp-a kir leh Nepali guide panga pawhin hliam an tuar a; mahse, an na lutuk lo.
“Ruang pathum hmuh tawh niin a dang palite zawn zui mek an ni,” tiin Deputy Superintendent of Police Gyan Kumar Mahato chuan a sawi.
Nepali dang pahnih pawh an chin an la hre lo bawk.
Mahato-a chuan rescue helicopter-in Dolakha-a Na Gaun a thleng tawh a, hei hi Yalung Ri base camp atanga darkar nga kal a ni.
Chin hriat lohte zawn hna hi khaw awm danin a zir loh avangin a harsa hle tih tual chhung chanchinbuten an tar lang.
Kathmandu Post chanchinbu chuan tawhsual tawkte hi a bul lawka metre 6,332-a sang, Dolma Khang lawn tuma inbuatsaih an ni tih a sawi.
Hetih lai hian Italian tlang lawn pahnih, Nepal khawthlang lama Panbari tlang lawn tumte zawn hna pawh thawh mek a ni bawk.
Stefano Farronato leh Alessandro Caputo te hi kar hmasa khan anmahni hruaitu pathum nen an tang a. An zinga pakhat, chanchinbuin kum 65 mi, Velter Perlino-a tia a tar lan erawh an chhanchhuak tawh.
Favang lai hi hawi khawthawng duh leh tlang lawn mi tan Nepal-a hun tha ber a ni a. Hetih rual hian khaw awm dan uchuak leh vur tawlh erawh a awm fo thin.
Kar hmasa khan Cyclone Montha-in Nepal-ah ruah tam tak leh vur tam tak a thlen a, Himalaya-ah mi tam tak an tangkhang.
British pahnih leh Irish hmeichhe pakhat pawh khawthlang lama Mustang region-a ni tam tak an tan hnuah chhanchhuah an ni.
October thla khan khaw awm dan uchuak tak avangin Mount Everest bulah hawi khawthawng mi za tel an tang tawh bawk.
Himalaya-a vur tawlhah pathum thi, pali dang zawng mek
