Pachhunga University College chuan Mizo historian leh ziakmi langsar B Lalthangliana hnenah ‘Laisuih Award 2023’ an hlan.
PU College hian kum thum dana an hman thin Cultural Day cum Music Day chu Zirtawpni khan an hmang a. He Day-in a kentel pakhat, thu leh hla hmanga Mizo hnam insuihkhawmna kawnga mi thawhhlawkte hnena an pek thin, ‘Laisuih Award 2023’ chu B Lalthangliana hnenah an hlan.
A thuziak hrang hrang hmang hian Mizo hnam chanchin thuk takin a chhuifiah a. Mizoram sawrkarin Mizo chanchin zir turin China-ah an tir hial. A thuziak hmang hian khawvel hmun hrang hranga Zofate a phuarkhawm a. Unau kan nihna a hai chhuak a ni. Heng a hnathawh avang hian Pachhunga University College chuan ‘Laisuih Award’ dawng turin a thlang ta a ni.
Laisuih Award hian sumfai Rs. 20000 bakah trophy leh thuziak (citation) a kengtel a. He award hi a dawngtu B Lalthangliana hnenah hian PUC principal hlui Dr Tawnenga’n a hlan a ni.
Laisuih Award hi mi pathumin an dawng tawh a. Kum 2011 khan hla phuah thiam V Thangzama’n dawngin, 2015 khan hla phuahthiam leh zaithiam Lalnunmawia (Valtea) chuan a dawng a, 2018 khan Tahan lama Mizo zaithiam, T-Melody band zaipu, Lalnunsanga hnenah hlan a lo ni tawh bawk.
B Lalthangliana chanchin:
41943 June 16 khan B. Lalthangliana hi South Khawbungah a piang a, a pa chu Ringchina a ni. Khawbungah hian pawl 4 thleng a zir a, hemi hnu hian khawchhak lamah an pem a, zirna chu a bul atangin a tan tha leh a ni.
4Kum 1975-ah Mandalay University atangin MA (History) chu distinction-ah a pass a, kum 12 chhung Mandalay University-a History department-a a thawh hnuin kum 1986 khan Mizoramah a rawn haw a, Hrangbana College leh Pachhunga University College-ah lecturer hna a nghet loin a thawk a, kum 1987 khan Hrangbana College-ah dahngheh a ni. Hrangbana College atang hian associate professor-in a pension a, fapa pali a nei.
4Kum 1961 vel atangin thu a ziak tan a, lehkhabu 64 ziak tawhin, seminar paper 104 a ziak tawh. A lehkhabu hi Mizo tawng, Kawl tawng leh Sap tawngtea ziak a ni. A lehkhabu tam ber hi Mizo history leh culture lam a ni ber a, literature lam lehkhabu pawh thahnem tak a ziak a ni. Lehkhabu a ziah bakah Mizo mithiam hrang hrang kutchhuak a lakhawm a, a bu-in a chhuah.
4A lehkhabu ziah pahnih – ‘Ka Lungkham’ (1989) tih leh ‘History of Mizo Literature’ (1993) te chu ‘MAL Book of The Year’ atan thlan a ni a; chawimawina chi hrang hrang 10 aia tam a dawng tawh a ni.