Mizorama HIV kai hmuhchhuah thar zingah kum 25 leh 34 inkar an tam ber a, a dawttu chu kum 35- 49 inkar.Mizoram State AIDS Control Society (MSACS) chhinchhiah danin, 2024 April leh 2025 November inkar khan HIV kai hmuh thar 3257 an awm a. Heng zinga 1164 hi kum 25-34 inkar an ni. Mi 931 chu kum 35-49 inkar, mi 631 chu kum 15-24 inkar an ni. ‘Thalai’ tia sawi theih heng kum bithliah pathuma HIV kai hmuh thar ringawt hi, hemi hun chhunga HIV kai hmuh zawng zawng atangin zaa 88.56 an ni.
Hemi hun chhung hian kum 14 leh a hnuailam HIV kai 59 hmuh an ni a; kum 50 leh a chunglam mi 293 chu hmuh thar an ni bawk.
HIV kai hmuh thar zingah hian inpawlna atanga kai 2167 an awm a, a kai hmuhchhuah zawng zawng atangin zaa 70.4 an ni. Mipa 1299 leh hmeichhia 868 an ni. Kawppui nghet nei emaw nupui pasal pawm lai nei emaw mi 1191 (55%) an ni a; kawp nghet nei lem lo 745 (34.8%), anpui kawp thin leh anpui leh opposite sex nena kawp kawp thei (bisexual) 168 (7.8%) an awm a, inzuar atanga kai chhawng 54 (2.5%) an awm a ni.
HIV inkaichhawn tam lehna chu hriau inhmantawm atangin a ni a, 831 (27%) niin, nu in a faa a kaichhawn 56 (1.8%) leh kaina ber hriat chian theih loh 24 (0.8%) an awm.
Hetihlai hian sawrkar kum kal mek anga chhutin 2025 April – November inkar khan Mizoramah HIV kai leh kai loh endik mi 145525 atangin a kai hmuhchhuah 2657 an awm a ni. 1990 October-a Mizoram-a HIV hrik kai hmuh hmasak ber atangin 2025 November thleng khan HIV kai mi 33781 hmuhchhuah an ni tawh a ni.
Mipat pui kawp thin hi MSACS-a inziaklut chin chu mi 1105 an ni a, hei ai hian an tam daih tih sawi a ni. MSACS hotute sawi danin, kumtin an pung zel a, heng mite hi HIV kai theihna an neih san bik avangin hmuh chhuah loh an hlauhawm hle tih an sawi. An hnena inziaklut duh lo an tam a, nupui nei lai renga mipa kawp an ni a, mi hriat an hlau a, an inthup hle tih an sawi. Khawpuiah chauh ni lo, thingtlang lamah pawh an awm tih an sawi a ni.
MSACS project director Dr Jane R Ralte chuan HIV kai pun danah national average chu 0.2% a nih laiin, Mizoram chu 2.75% a la ni a, kum 2018 atangin HIV kai thar thlahniam a, a do kawngah pawh NACO chuan hnathawh that ranking a pekah hma an sawn zel a, 2024- 2025 khan 5-na niin, 2025- 2026 ah chuan 3-na kan ni tawh tih a sawi.
Health minister Lalrinpuii chuan, sawrkarin kawng hrang hrangin HIV/AIDS laka himna turin theihtawp a chhuah ve reng tih National AIDS Control Organisation-in state leh UT hmasawn dan a tehna atangin a tilang chiang a, chutihrualin sawrkar chauh ni lo, kohhran leh tlawmngai pawlten theihtawp an chhuahpui turin a sawm tih a sawi a ni.
HIV kai hmuhchhuah zingah kum 25 – 34 inkar an tam ber
