HIV kai theih dan inhrilh tha ber
pawl niin, kai tam pawl kan ni lawi
– Health minister
Mizoram chu HIV inkai chhawn theihna leh a inven dan hriatna lama India rama inhrilh tha ber pawl kan nih laiin, mipui cheng zat azira chhutin a kai tam lamah India rama sang ber kan ni lawi tih Health minister Lalrinpuii chuan a sawi.
Mizoram State AIDS Control Society (MSACS) leh District AIDS Prevention & Control Committee (DAPCC) Lunglei District tangdun huaihawtin World AIDS Day 2024 pualin Thawhtanni khan Lungleiah hun hman a ni a. Mizoram Health & Family Welfare minister hian a hmanpui.
Kum 1990 atanga chhinchhiah danin Mizoramah HIV kai 28028 an awm tawh a, kum 2023- 2024 chhung khan HIV kai thar 2059 hmuh chhuah niin, Lunglei district (Hnahthial district la telin) kumin January atanga October thlenga thisen 4997 endik zinga 99 (1.98%) chuan HIV an kai tih hmuhchhuah a ni tih Lalrinpuii hian a sawi a. HIV/AIDS chu “nungchang kaihhnawih natna” tia sawi thin, HIV hrik pai hmuh chhuah tawh atanga zaa 93 aia tam chu invenna tel loa mipat hmeichhiatna hman atangin leh inchiuna hmanraw thianghlim lo inhman tawm atanga kai an ni tih a sawi.
“Hei hian HIV chu inkai chhawn theih natna ni mah se, inven theih a nih zia a tichiang hle a. Mizoram hi HIV inkai chhawn theihna leh a invenna kawng hriatna lamah India rama hre tha ber pawl kan nih laiin, mipui cheng zat azira a kai tam lamah India rama sang ber kan ni a, HIV kaina kawng leh inven dan kan hriatte kan zawm that loh vanga kai tam kan ni tih a lang,” a ti.
World AIDS Day hmannaah hian sawrkar official-te bakah kohhran leh tlawmngai pawl aiawhte leh zirlai an tel a. HIV laka him nana inven fimkhur pawimawh zia lantirna leh a veite hmusit leh thinhrik loa, hmangaihna nena enkawl zawk tura inchahna lemchan tawi entir a ni a. Ruihhlo laka fihlim tura intiamna hun leh HIV/AIDS do tura intiamna signature campaign buatsaih a ni bawk.
HIV kai theih dan inhrilh tha ber pawl niin, kai tam pawl kan ni lawi – Health minister
