HIV+ zinga 70% sex atanga kai
Mizoramah HIV kai hmuhchhuah 33000 chuang an awm tawh a, heng zinga zaa 70 chuang hret chu inpawlna atanga kai an ni.
December 1 kha World AIDS Day 2025 a ni a, he natna avanga nunna chan tawhte hriatrenga ni a nih bakah he natna a darh zel lohna atana inhrilhtharna ni atan hman thin a ni. Mizoramah pawh district hrang hrangah hman a ni a, Aizawlah chuan Mizoram State AIDS Control Society bultumin Assembly speaker Lalbiakzama hoa hman a ni.
MSACS project director Dr Jane R Ralte report danin, 1990 October-ah Mizoram-a HIV kai hmuh chhuah a nih atangin kumin October thleng khan HIV kai mi 33641 hmuhchhuah an ni tawh a. Heng zinga zaa 70.03 chu inpawlna (mipa leh hmeichhia inkar bakah anpui kawp) atanga kai an ni. Zaa 27.03 chu ruihhlo ngai inchiuna hriau inhmantawm atanga inkai chhawng an ni a; nu-in a faa a kai zaa 1.08 leh kai chhan hriatchian loh zaa 0.74 an ni.
Inpawlna atanga HIV kai hmuhchhuah zingah kumtin mipa, mahni anpui kawp atanga kai an pung chho zel niin a sawi bawk.
Hmanpuitu Assembly speaker chuan, Mizoramah mihring nuai 12.6 awrh kan awm laia HIV prevalence rate sanna ber kan ni chu pawi a tih thu a sawi a. “MSACS-in HIV umbo thuai a nih theihnan kumin atanga tanin kum 2030 thleng kumtin zaa 80-a tih hniam tumin beihpui a thlak dawn a, hemi kawngah hian mipui leh NGO pawhin theihtawp kan chhuahpui a tul a ni,” a ti.
Tunah HIV kai hmuh chhuah apiang rang taka ART damdawi lakna tur ART Centre 14 (Aizawl-ah 4 leh District Hospital tinah) a awm a. ART damdawi la mek (alive on ART) mi 18231 an ni a, chutih rualin ART damdawi la tura ziahluh leh ei sil tawh, ei chhunzawm leh duh lo mi 1169 an awm. HIV kai hmuhchhuah tawh atangin mi 7000 chuang chu ART damdawi ei lo an awm a ni.
HIV+ zinga 70% sex atanga kai
