Vanarasi khaw pa, Dr Jagdish Pillai chuan Shri Ramcharitmanas chu darkar 138, minute 41 leh second hnih chhung sain, Guinness World Record, khawvela hla sei/thui ber record a siam. Hetiang hla hi chu hman fê loh chuan sak mai mai chi pawh a ni loh hi!
Shri Ramcharitmanas hi khawvel hmun hrang hrang a official audio channel 100 chuangah kum nga chhung tihchhuah a ni tawh a, Dr Jagdish Pillai hian Guinness World Record siam nan a hmang ta a ni. A hmaa hla sei ber record chu Saint Albans, Hertfordshire, UK a awm, Mark Christopher Lee and The Pocket Gods siam a ni a, an hla sak rei zawng hi darkar 115 leh minute 45 niin, December ni 1, 2021-a record an siam kha a ni. He record hi Jagdish Pillai hian a rawn khum ta a ni.
Jagdish Pillai hian instrumental music play-in record hi a siam a, Shri Ramcharitmanas tan hian a melody thar a siam nghal zel a, darkar 138, minute 41 leh second hnih zaiin record hi a siam ta a ni. He hla hi music streaming platform hrang hrang-ah tihchhuah a ni a, chung zingah chuan Apple Music, Spotify leh Amazon Music te pawh a tel a, Guinness chuan ‘official taka hla tlangzarh zinga sei ber’ leh ‘khawvela hla sei ber’ record-ah an puang ta a ni.
Jagdish Pillai chuan 2016 vel atang khan hetiang record hi siam chakna a lo nei tawh niin a sawi a, chutih lai chuan record hi American artist siam a ni a, instrumental music a ni bawk. Jagdish chuan India hian thawnthu sei tak tak Ramayana leh Mahabharata te kan nei a, chu chu record siam nan a hman theih a lo ring thin niin a sawi.
Jagdish hian May ni 20, 2019 atangin a hla hi video recording a ti tan a, Guinness World Records guideline a zawm zel a, mahse, COVID-19 avangin kum khat aia rei mah chu recording a chhunzawm thei lo va, COVID ziaawm hnuah record chhunzawm lehin, November ni 10, 2022 khan recording a zo ta a ni.
A hla record-na bakah editing leh mixing zawng zawng te nen a hla peih fel nan hian kum li leh ni 63 leh darkar 295 an hmang a ni.
Hla sei ber
![](https://theaizawlpost.org/wp-content/uploads/2023/05/hla.jpg)