Zoremi Hmar Zote
Ka ngaihtuah mai mai a, kan lo pian a, nikhua kan hriat phat atang hian kan nun hi ‘inhlawh’ reng reng hian a intan nghal ringawt mai a lo ni! Kan ni tin khawsak phung, kan hma lam hun atana tan kan lakna te, kan thil tih engkim mai hi ‘hlawh’ nei tura ti kan lo ni reng mai.
Sikul kan han kal a, lehkha zir a, thiam a, hna tha tak thawk turin kan kal a. Chuta kan tum pawh chu hlawh neih a ni. Hlawh nei thei tura inzir theuh theuh zingah, sawrkar hna thawk thei ta kher lo pawh a tam zawk kan awm tho va, chu’ng te pawh chuan kut themthiamna lam emaw, huan lo ram neih emaw, ran vulh emaw chu ei zawn nan kan hmang tho va, chu pawh chu ‘hlawh’ neih nan tho a ni, kan thawh ni. Thiam thil hrang hrang zirna-a kan zir chhan te leh sawrkar hna kan thawh chhan te, kan hna thawh tinreng hi ‘hlawh’ hmuh na’na thawk kan ni vek.
Aw le, sum chauh hi hlawh a ni kher chuang lo va, kan nungchang, kan tawngkam, kan duh rêng vanga kan thil tih engkim maiah hian kan thil tih phû tawk ‘hlawh’ kan la zel bawk a. Kam tam hlawh te, ân cheh hlawh te. Duham luat hlawh leh ruihhlo tih vanga a tawpa kan hlawh chhuah te pawh a awm ve bawk e. Tui baw hnû ruh leh theih tawh lohna khawvelah hian leili vêng zo lo deuh chuan ‘rin hlawh lo hlawh’ an la a, ruihhlo ngâi chuan a taksaah hlawh duhawm lo tak a seng ve nghal bawk thin. Hlawh rau rauah rinawm loh hlawh te, hlemhlet hlawh te, dawt heh hlawh te, sualna hrang hrang avanga kan hlawh chhuah te chu lâk châkawm lo tak, kan hlawh atana khuarelin kan chunga a nghah avanga lak loh theih si loh te an ni a, chutih rualin thatna avanga hlawh lâk erawh hlimna a ni. Kan chi tuh rah theuh kan seng dawn a, hringnun kan hman dan azir zelin hlawh kan nei theuh dawn a ni.
Nu leh pain an fa an enkawl that loh chuan an thil tih hlawh an lâk hun a thleng ngei ngei dawn a, inchhir a sâwt tawh loh hnu-a indawm kun kha an hlawh lâk chu a ni mai. Chutiang bawkin fate pawhin nu leh pa thu an awih loh man te, nu leh pa tana harsatna thlentu an nih hlawh te an la ve bawk a. Nu leh pa, fate ngaihsak leh hmangaih taka enkawl thin te, nu leh pa thu awiha sual kawng zawh lo, nu leh pa mualphona thlen ngai lotu hlawh erawh a mawiin a hlû a, hlimna leh thlamuana duhawm tak an hlawh thin. Chhungkua hmangaih em em leh midangte hmangaihna ngah tak mi chuan a phû tawk hlawh a la a, hmangaih leh duhsak, duat leh ngaihsak a hlawh chhuak thin.
Hringnunah hian harsatna te, natna leh lungngaihna tawng ve miah lo kan awm kher lovang. Kan hmangaihte kan chàn vanga natna te, thihna leh thil dang tam tak avanga natna te hi mi tin ta, mi chungah chauh emaw thleng tur kan tih laia kan ta ni ve tho si a ni. Vanduaina tam tak, keimahni insiam chawp chu awm ve bawk tho mah se, khuarel chhiatna erawh kan dang thei lo va, kan chunga thil thleng turah duh thlang thei lah kan ni hek lo. Pathianin a anpuia duh taka a siam mihringteah hian chhia leh tha hriatna thiang tak min pe leh zel a, harsatna a lo thlen pawha chhelna te, tumruhna leh chaknain min la thuam cheu bawk. Engkim mai a êng zawnga thlir tlat mi chu mi chak, mi vannei a ni. A hun laiin tawrh har deuh mah se chhel taka tuar hram hramtu chuan a tawpah hlawh duhawm tak a la nge nge thin.
Hlawh tha tak kan lâk theihna turin nun kan uluk a ngai a, mihring ngaiha mi tha leh Pathian mit hmuha a lawm tlak kan nih a ngai. Midang chunga rilru chhe tak pu thin mi chu a hlim ngai lo va, midang chak lohna leh an chhiatna lai zawng ngar ngar thin mi chuan thil tha a hlawh chhuak ngai lo va, mahni inhremna a ni. Keini mihringte avang hian kan khawvel hi a nuamin a hlimawm thei a, keini mihringte avang tho hian hrehawm leh ninawm a ni thei bawk. Chhungkaw hlim leh hlim loh chu chhungkaw member tinah a innghat vek a, rilru kawi leh herh deuh pakhat lek pawh an awm palh hlauh chuan chhungkua a chawk buai theiin, chhungkaw hlim lohna a thlen thei a ni. Chhungkaw hlim ni tur chuan inhmangaih tlàn a ngai a, kan dik lohna leh thiam lohna te, kan tlin lohna lai te inhmuhkânsak a, hmangaihna nena indâwm kang zel tur kan lo ni.
Chhungkua ber kan hlim loh chuan hmun danga hlimna te chu a lem a, rei a daih lo va, thinlung taka hlimna kan mamawh tho tho thin. Chhungkua ber kan hlim chuan pawn lama natna leh harsatna te chu nêm zawkin kan tuar thei a, chhungkuaa hmangaihna lêng vel chuan hahdamna min pein, harsatna hneh a awl sawt ta thin a ni. Chhungkaw hlim chuan zahawmna an hlawh chhuak a, midangte tan awh-awm leh fakawm an ni thin. Chhungkaw hlim leh duhawm tak atangin nula tlangval sual an chhuak mawh hle a, inngaihsak lohna leh innghirnghona, chhungkaw hlim lo atang bawkin misual an chhuak thin.