Ruihtheihthil kan tih rem chuan engemawchenah tharum thawh leh hleilenna tih reh a ni nghal dawn tih Social Welfare minister Lalrinpuii chuan a sawi.
Mizo Conference Seventh Day Adventist hnuaia Womens Ministries huaihawtin Inrinni khan Millenium Centre kawtah hleilenna tirem tura inzirtir tharna Ni hman a ni a. Women & Child Devlopment minister ni bawk Lalrinpui hian hmanpuiin, ram thenawm leh khawvel hmun dang dangah indona leh tharum thawhna, hleilenna chi hrang hrang a thlen mek bakah thihna thlen lem lo, mahni inchhung, hnathawhna hmun leh zirna inah hleilenna a thleng reng a. Mizoramah ngei pawh, a bikin hmeichhia, an hnathawhnaa an hotute atanga hleilennna tawk an awm fo a; zirlai zingah huaisen leh chak zawkin an aia naupang leh dawih zawk tih duhdah leh an hleilenna a tam em em tih a sawi.
“Ruihtheih thil hi tharum thawhna leh hleilenna thlen tirtu pakhat a ni a, kan tih rem phawt chuan heng thil hi engemawchen a ziaawm phah ngei dawn a ni,” minister hian a ti.
Women & Child Development department-a district programme officer (ICDS) Dr Lalhruaitluangi Chhangte chuan naupang leh hmeichhiate chunga tharum thawh leh hleilenna laka dan awmte sawifiahin, tanpui ngaiten an pan tur leh hma lak theih dan a sawi a. Mizoramah hmeichhiate chu eizawnna leh khawtlang nunah zalen takin lang mah se, hleilenna lakah an fihlim ta tihna a ni lo tih a sawi.
The Protection of Women from Domestic Violence Act 2005 hnuaia hleilenna in a huam – kut inthlak, tawngkama invau, rilru inhliam sak, sum leh pai hman kawnga inhrek beh leh mipat hmeichhiatna hman kawnga duh lo chunga tih luih ang chi a tel vek tih a sawi a. He dan hnuaiah hian a tuartu emaw midang emaw in thubuai an thehlut/ thehluh sak thei a. District tinah protection officer an awm a, an thawhpui – service provider an awm leh bawk a, women helpline – 181 ah engtik lai pawhin an biakpawh theih reng tih a sawi a ni.
Kut thlak tuar chhanchhuah ngai an awmin an chhanchhuak thei a, thubuai an thehluh sak thei a, councelling pek, awm lailawkna tur ngaihtuah sak, an hriat tur dan inhrilh leh mamawh dang pek leh ngaihtuah pui theih an ni tih te DPO hian a sawi.
Hleilenna tih remna tura inzirtir tharna Ni ah hian Aizawl Adventist Hospital medical director Dr Eileen Lalrinpuii leh Mizoram State Council for Child Welfare member C Luri te pawhin thu an sawi a. Thusawi kar lakah zaithiamten zaiin kalkhawmte an awi a, hleilenna tih bo a tul thua aurual a ni bawk.
Hleilenna tih rehna atan Ruihtheihthil tih rem a tul – Social Welfare minister
