Real Madrid boss Carlo Ancelotti chuan tun season tan chhoh taka player hliam chhawr theih loh a neih pheng phung chhanah an fixture list khat tha lutuk a puh.
Karliamta Inrinni La Liga away game-a Real Sociedad an hneh tumin forward Brahim Díaz chu first half-a thlak ngai phawtin a inhliam ve leh a, endik a nih hnuin a ke dinglam tihrawlah chawlhpui deuh ngai tur hliam hmuh a ni.
ESPN tarlan danin Diaz hi thla hnih vel a chawlh hmel a, a tirah tak phei kha chuan club lamin thla thum lai chhawr thei lo turah an inngai hman a, mahse, an hlauhthawn aiin a kir hma thei dawn niin a lang.
Tun kan hnung chawlhkar engemawti hhung khan midfielder rualkhat – Jude Bellingham, Aurélien Tchouameni, Eduardo Camavinga leh Dani Ceballos-te chuan hliam vangin khelmual an lut thei lo a; Champions League game-a Stuttgart an hmachhawn tur behchhan news conference-ah Thawhtanni khan Italian coach chuan Bellingham leh Tchouameni erawh zanin game atan an fit tih a sawi.
Ancelotti chuan ti tak maia a player-te an inhliam nasat chhanah calendar-a inkhelh hun tam lutuk a puhtlu a, “Tunah Champions League a lo ni leh a, engtia rei nge kan daih dawn a hriat loh a, extra game hnih chu kan neisa hrim hrim a; mite ngaihhlut leh phurpui theih zawk competition ni turin game khelh zat tihtlem hi a leireltute’n ngaihtuah teh se,” a ti.
Real boss hian Thawhtannia training zawm lo defender Eder Militao chu a hahdamtir mai a nih thu leh Stuttgart hmachhawn tura a fit thu chanchinbumite hnenah hian a sawilang tel.
Inrinni penalty a thun zawha a goal lawm dan avanga sawisel hlawh forward Vinicius Junior thlavang hauh bawkin, Reale Arena mipui lam hawi zawnga a kutzungtanga a hmui a han siktir velah khan fans diriama puhna a awm a, Ancelotti thung chuan mihang a nihna zawna Brazil international-in chhaihnawmnah leh hmusit a tawh zozaite hriatpui chunga dawh ve turin sawiseltute a phut let.
Hliam tihbuai Ancelotti
