Hma a sawn huna kir chauh tur Grealish

Hma a sawn huna kir chauh tur Grealish
Manchester City boss Pep Guardiola chuan a midfielder beisei pha lo Jack Grealish chungchang tunhnaiah sawichhuakin, inkhelhna hmun chang tur chuan theihtawp a chhuah phawt a ngaih tur thu leh hma a sawn hunah chauh khelhna hun siamsak a nih tur thu a sawi.
Spanish coach hian England midfielder chu bench lamah a dah ta deuh reng rih a, tun season-ah game 19 chiah first eleven a la chang a, chu’ng zinga match sarih lek chu Premier League lamah a ni a, season liamta Champions League final-a Inter Milan an hnehna game a khelh tluan lai nen kha chuan a boruak hip a dang ta hle a ni!
Champions League final-ah khati kha ni bawk mah se FA Cup final-a Manchester United an hneh tum erawh kha chuan minute khat chiah khelmual a lut a; a khelh danin hma a sawn zet loh chuan starting line-up a chang regular thei dawn lo tih City manager ka atangin hriat tur a awm zui ta a ni.
Kum 28 mi hian season liamta Treble-winning campaign-ah kha chuan City tan game 41 teh meuh starting line-up a luah pha a, chu’ng zingah chuan FA Cup leh Champions League final a tel.
Tun term-ah erawh first eleven-ah a lang khat ta pharh a, an boss tarlan danin a hmabak hi a la eng lutuk lo!
Guardiola chuan, “Player ngai reng kha a la ni a, a manager hrawn pawh a la ngai reng a, kan team khelh dan pawh kan la thlakdanglam lo a, a khelh dan danglam ta tlat hi danglamna awmchhun chu a ni,” a ti.
Tarlan tawh angin, tun season-ah Grealish hian top-flight lama luhhmasak chan a harsat ta tlat a, starting line up vawi 19 a chan tawha vawili chu Community Shield leh European Super Cup bakah Saudi Arabia rama Club World Cup game hnih kha a ni.
League game-a luhhmasak a chan tawpna chu nikum December ni 30-a Sheffield United an hmachhawn daih tawh kha niin, tah pawh khan a khel tluan zo leh ta chuang lo a, second half tir lam minute 52-na lekah forward la naupang tak Oscar Bobb chuan a thlak.
£100m man Grealish hi karliamta Inrinni pawh khan Bournemouth an hnehna game-ah bench a luah tluan leh a, FA Cup fifth round-a Luton an luhkhung hunah pawh bul a tan dawn tih tiamna engmah manager ka atangin a la richhuak lo.
Guardiola chuan Grealish an mamawh thu an sengluh tirh phat atanga a sawi tawh kha a la ngai reng tih sawi chungin an team-a special quality kawltu a nih thu a sawi zet a, chuti chung chung chuan khelhna hmun a chan leh chan loh chu amaha innghat a nih thu a tarlang tel.
Grealish chauh hi Guardiola team-a khelhna hmun leh hun chang mumal ta lo a ni lo. Barcelona leh Bayern Munich coach hlui hian England international bakah player dangte pawh warning a pe vek a, inkhelhna hmun chang tum tan inthlahdah a thiang lo tih sawiin a vaukhan.