Hmangaihi debut album August-ah tlangzarh dawn
2022 Mizo Idol T Vanlalhmangaihi album hmasa ber ‘Rimawi Zinkawng’ tih chu August thla chawhnu lamah tlangzarh an tum ta. Hla pariat awmna album-ah hian music video pathum vel a awm ang a, a dang zawng chu audio a ni ang. He album-ah hian hla thar vek dah a ni dawn a, Hmangaihi hlaphuah pathum emaw pali emaw vel an dah te ang.
Hmangaihi chuan, “Hla thar vek tur a ni a, a title pawh kan la siam mang lo a,” tiin, hlaphuah lamah pawh a thianpa Ngaihsaka leh a mentor Mangheta te nena an phuahho bakah ama phuah te a ni a. Mizo zaithiam zinga mahni hla sak tur phuah thei kan neih tlemte zinga mi Hmangaihi album hi YouTube lamah kan hmu nghal mai dawn lo a, “A hautak ve si a, eng emaw zat tal kan hmuh let ve a ngaih avangin kan zuar phawt ang,” tiin, YouTube-a dah nghal mai a tum loh thu a sawi.
Tunlaia zaithiam tan album siam a hlawk tawh lo an tih lai leh, album tlangzarh thawm hriat tur pawh a awm tawh mang loh laia album tlangzarh a tumna chhan sawiin, Hmangaihi chuan, “Album siam hi ka tumna a rei tawh a, rokhawlhna a awm thin avangin ka ti hleithei thin lova, single han tihtawp aiin album hian hlutna a nei tha viauin ka hria a, damchhunga hriatreng atan leh Idol ka lo nihna anga ka Idol milestone pawimawh tak tur a ni dawn a, artist ka nihna nemnghettu atan hman ka tum bawk,” a ti.
Hmangaihi chuan a album atan hian Lusei Entertainment Company nen contract an neih thu sawiin, “Tunah hian ka album hi Lusei Entertainment Company (CUSTOMER CENTRIC
ENTERTAINMENT COMPANY) te’n min produce sak dawn a, anni nen hian tunah hian Official Contract kan sign tawh. Anni hian engkim min buaipui sak a, album piah lama buaipui ngai zawng zawng min buaipui sak a, an zarah hian ka album turah hian ka rilru zawng zawng ka pek
theih phah a ni. Kan contract neih dan zawng zawng hi chu sawi a rem vek kher lo ang a, pahnih khat chauh han tarlang ila, ka album a hla pahnih music video min siamsak dawn a, tin, LUSEI ENTERTAINMENT COMPANY ni lo Production Company dang ka thawhpui thei dawn lo
bawk a, contract hi chu album kan release hnuah leh kan agreement dang kan tihfel hnuah chuan a zo ve mai dawn a ni,” a ti.
Lisei Entertainment-ah hian tuna Mizo Idol Judge zinga mi Robin Lalremruata chu Company din tute zingah telin, Director pakhat a ni a. Mizo zinga talent nei tha tak tak, mahse, mipuiin kan hriat lutuk lem loh (hidden talents) ang te platform siam saka an invawrh chhuah theihna tur, promotion lam tunah hian an buaipui mai bakah, Mizo ni lo, hnamdang artist te pawh Mizo nena thawkho thei tur khawpin promotion leh management lamah hma an la mek a, an chetvela te belchiang duh tan Instagram lamah lusei_entertainment account a awm e.
Hmangaihi chuan, “Tunah hian recording kan buaipui chho mek a, Aeris Records, Chanmari West (Zuala Jahau) leh Lord’s Audiocraft (Mangheta Jahau) ah te recording ka ti mek a. Aeris Records-ah hian ka track tam zawk siam a ni dawn a, Lord’s Audiocraft-ah hian vocals zawng zawng ka record thung dawn a, anni pahnih hi ka music
career-a mi pawimawh tak tak te an nih avangin tunah pawh hian anni pahnih kher hi thawhpui ka duh a, an kuthnu hi ka album, kumkhua a awm tawh turah hian awm reng tawh tura ka duh vang leh an hnathawh te hi mi tam tak hian lo hriain, lo pan ve se ka duhsak a ni,” a ti bawk.
Hmangaihi debut album August-ah tlangzarh dawn
