Hmangaihna, inzahtawnna, inngaihtlawmna tlachham ti

Hmangaihna, inzahtawnna leh inngaihtlawmna te chuan Indian politics-ah hmun a chang lo, tiin Congress leader Rahul Gandhi chuan Texas-a Indian American community pungkhawmte hnenah sawiin ‘one idea’ neitu Rashtriya Swayamsevak Sangh (RSS te chu a sawisel bawk.
“RSS te hian India hi ‘one idea’ angah an ngai a. Keini chuan India chu ‘multiplicity of ideas’ ah kan ngai thung” tiin a sawi.
“United States ang bawkin, mi tu pawhin a tel duh te an tel remtih kan duh a ni. Mi tu pawhin a duh a tih theih kan remti tur a ni a, tute pawh hun remchang eng hnam, sakhua, tawng, tradition leh history hrang nei te pawh ni se kan pe tur a ni,” tiin a sawi.
“Indona a ni a. Indona chu inthlanah India mipui maktaduai tel tena fiah taka Prime Minister of India chuan Constitution of India a bei a ni tih an lantirnaah a fiah a ni. Ka sawi ber chu union of states tihah hian tawng inzahtawnsak te, sakhua inzah tawnsak te, tradition leh caste inzahtawnsak te, heng te hi Constitution a awm vek a ni,” tiin Gandhi chuan a sawi bawk.
“Kan political system a kan tlakchham ber chu party hrang hrangah pawh hmangaihna, inzahtawnna leh inngaihtlawmna a ni. Kan sakhua vawnpui chauh te, kan community, caste leh State leh kan tawng ang hmang te chauh ni lo kan mihringpui tinte kan hmangaih tur a ni” tiin a sawi bawk a.
“Mi thiltithei chauh ni lo, a chak lo ber leh inngaitlawm te, midang ni lo mahni theuhah pawh India tha din duhtute kan zah tur a ni a. Chu chu ka rilru puthmang a ni” tiin a sawi bawk.
Lok Sabha inthlana BJP tena anmahni a majority an neih phak loh chungchang sawiin Gandhi chuan, “Mipui ten BJP ten kan tradition, kan language etc te an bei an ti a ni. An hriatthiam dan chuan mi tupawh Constitution of India beitu chuan kan religious tradition a beiah an ngai a ni,” a ti a.
“Inthlan result puan a nih chiah minute-ah India mi tumahin BJP, Prime Minister te an hlauh lohzia kan hmu thei a, chu chu hlawhtlinna turu tak a ni. Demcracy duhtu India mipui te chuan Constitution beitute chu an pawm dawn lo tih an pholang chiang a. Kan sakhua te beitu kan pawm dawn lo va, kan State te beitu kan pawm dawn hek lo,” tiin a sawi bawk.
US-in India a mamawh a, India pawhin US a mamawh tia sawiin Gandhi chuan Indian diaspora chu ram pahnih te kara leihlawn dawhtu a ni a ti bawk a.
“Ka ngaihdan chuan heng ram pahnih te hi zalen takin in kartawn chhen tur a ni a. United States-ah Idea of India pulut u la, India-ah idea of United States pulut bawk rawh u” a ti bawk a. “Tihtur pawimawh tak in nei a, he ram pahnihte inzawmna hian hma lam hun a hril dawn a ni,” tiin a sawi bawk.
Gandhi chuan India ramah mi maktaduai telte skill chu ngaihsak lohin a awm tia sawiin Mahabharata-a a guru demand a neih theih nana Eklavya-ah a kut zungpui a tanchhum thu a sawi bawk a.
“Eklavya story kha in hre tawh em? India rama thil thleng in hre duh a nih chuan, ni tinin Eklavya story ang nei maktaduai tel an awm a ni. Skill nei mipuite sirah hnawlin an awm a, an hmasawn remtihsak an ni lo va, chung ang chu hmun tinah a thleng mek a ni” tiin Rahul Gandhi chuan a sawi bawk.
Mahabharata ah military welfare expert Dronacharya chuan tribal community mi Ekalavaya chu archery a zir theih nana ‘guru dakshina’ tan a kut zungpui dinglam tan turin a ti a ni.
“Mi tam tak chuan India chuan skill a tlachham an ti a India hian skill a tlachhamin ka hre lo, India hian skill nei mite a zah lo zawk a ni” tiin Gandhi chuan a sawi bawk.
Gandhi chuan India theihna tak tak chu skill neite hrefiah leh zaha financially leh technologically a chung skill neite puihin a inpho lang tak tak ang a ti bawk a. “India theihna hi a mipui zat atanga 1-2% te chauh i tihchakin i lailang ngai dawn lo” tiin a sawi bawk.
India, US leh khawthlang ram te chu unemployment problem an nei vek a, China chuan a nei ve lo, a chhan pawh global production a thunun mek a ti bawk a. Gandhi chuan India ramah manufacturing thlurbing a ngai a ti bawk a.
West, America, Europe leh India te chuan ‘idea of production beidawnsanin’ China hnenah an hlan a ti bawk a.
“Production chuan hna a siam a ni. Kan tih, Americans te leh Khawthlang ram tena an tih chu consumption organise mai a ni. India chuan thil siamchhuah leh production organise a ngaihtuah a ngai a. India chuan eng nge siam chhuah ngai, siam chhuah ngai chu China siam atan dah tur a ti thei lo. Vietnamese te tih atan emaw Bangladesh te tih atan emaw a khek thei lo” tiin Gandhi chuan a sawi bawk a. “Mi tam tak tan hna tautet siamna awmchhun chu thil siamchhuah a ni a, thil siamchhuah tan a ni,” a ti bawk a.
“Chumi chu kan tih hma chuan unemployment sang tak kan nei reng ang. Chu chu a sustainable lo bawk. Manufacturing lam kan hnuchhawn zui zel a nih chuan India emaw US emaw Europe pawhin social problem turu tak kan hmachhawn dawn a. Politics polarisation pawh he thil hian a hrin a ni” tiin a sawi bawk.
Sumdawnna leh education system inkar awl zau hnawhkhah nan pawh vocational training kalpui ngei a ngai a ti bawk a. Tech thar ber berin mipuite hna a laksak zel chungchangah pawh Gandhi chuan, “I zir a nih chuan i tan hun remchang leh tha a ni ang a, i zir lo a nih chuan harsatnain a tlakbuak zui ang che” tiin a sawi.
“Thil thleng mek chu mi thenkhatte hna technology-in a chhuhsak mek laiin mi thenkhatte tan chuan hun remchang hawngtu a ni thung. Hna hi a bo vek dawnin ka ring lo va, hna hrang hrang insiam chuan sector hrang hrangah hlawkna a thlen zawk ka ring,” tiin a sawi bawk.