Duh deuh i nei a, mahse, i duh deuh kha tu te emawni pawhin an lo duh ve thei tho tih hriat reng tur, chutiang hunah chuan i duh deuh chu i chhai thluk theih nan fair-lo tak tak a awm lo. I theih tawp chhuah rawh le.
Eng emaw tihpui nikhua emaw party-naah emaw i kal a, hmeichhe pakhat, i duh zawng tak i hmu ta a, i dream girl pawh a ni maithei, mahse, khati lai vela awm ve midang panga vel tan pawh an dream girl a lo ni ve reng thei. Chung ho chuan a rilru hmin tumin an lo kil bial laih tawh zawk pawh a ni thei.
Beidawng suh, i tih tur chu, chung midang te ai chuan i thlannawm zawk tih lantir a ni. Engting nge i tih tak ang?
Thufing pakhatin “Hnehna chu a man pe phal te tana dah a ni,” a ti a, chuvangin nang pawhin a man i pek ve ngei chu a ngai ang. A thlawn ngawt chuan chhai thluk mai inring bik suh, insen so ve deuh pawh i inhuam a ngai dawn e. Hlawhtlinna chuan man a nei tihah chiang phawt mai teh.
I inseng so a nih pawhin ‘investment’ angah ngai mai rawh. Tawngkam thlum chu a dawng hnem tawh lutuk chuvangin tawngkam thlum mai bakah thildang i telh a ngai. Chumi atan chuan insengso hreh hauh suh!
I hausak leh rethei emaw, i palen leh patet lam a pawimawh lo. I khingpui chu eng ang mi nge a nih tih lamah buai suh. I chanchin mawi lo deuh an lo sawi a nih pawhin pawi ti lem suh, midang pawhin i duhlai chu an duh ve tho avangin tihkian theih dan che an ngaihtuah dawn a, zak taka siam che pawh an tum ang.
Nang aia hna sang zawk a thawk emaw, i hna neih loh thu leh i eizawnna chhuanawm vak lo te pawh a lo sawichhuak a ni thei, cool takin awm rawh. A sawitu kha chutiang a sawi vang chuan an ngaihsan phah dawn miah lo. Eng ang mi nge i nih tih aiin eng rilru pu mi nge i nih tih kha a pawimawh zawk chu a ni.
Eng emaw hlekah tlawm zawkah inngai nghal ngawt suh, a tawp thlengin tang la, a tawp rat tak tak thlengin tang rawh.
I pheikhawk bun leh eng body spray nge i hman tih lam aiin engtin nge midang bula i khawsak tih kha a pawimawh zawk. Tan i lakna lamah polite lo taka chet ching lo la, midangin hrehawm an tih theih dan tura awm ching suh. Hmeichhia te hian chutiang chu an chik ru ve khiau a nia.
I theih tawp i chhuah hnuah i hneh ta lo a nih pawhin pawiti suh ‘Love is a battlefield’ an tia lawm!