Khawvela hmarcha thak ber Carolina Reaper ching chhuaktu Ed Currie chuan Carolina Reaper aia a let thuma thak zawk hmarcha a siam chhuak leh ta a, Pepper X a ti a, he hmarcha hi Guinness World Records chuan khawvela hmarcha thak berah a puang.
Ed Currie chuan Pepper X a ei hmasak ber tum chuan, “Darkar thum leh a chanve vel chu a thak a, chumi hnuah pum a rawn na tan,” a ti. Pepper X hi mi pangain an ei chhin tawh a, chung zinga pakhat chauh chuan a pum khat a la ei zo thei. Currie chuan, “A nat dan chu rapthlak tak a ni mai. Marble chhuatah, ruah sur hnuaiah darkar khat chuang ka bawk phek thlar mai a, a nat lutuk avangin ka rum ham ham reng mai a ni,” a ti bawk.
Hmarcha thak zawng tehna hi Scoville Heat Unit (SCU) an ti mai a, hmarchapui kan tih mai ho hi 5,000 SHU vel a ni a, Carolina Reaper hi SHU maktaduai 1.64 niin, tuna hmarcha chhuak thar Pepper X hi chu SHU maktaduai 2.69 zeta a thak a ni.
Carolina Reaper hi Ed Currie hian crossbreed atanga a siam chhuah a ni a, 2013 khan khawvela hmarcha thak ber nihna a rawn hauh a, a record hi kum 10 vel hnuah Pepper X hian a rawn khum ta a ni. Carolina Reaper hi chu hmarcha sen tai hlar mai a ni a, Pepper X hi chu a hring-eng deuh a ni ve thung a, a hmel en chuan chuti taka thak tur hmel pawh a pu hran lo va, Carolina Reaper crossbreed a ni.
Hmarcha ti thaktu hi capsaicin an ti a, tam tham taka kan ei te a nih loh chuan thil hlauhawm pawh a ni lem lo. Chutihrualin mihring rilru leh ngaihtuahna chuan capsaicin hi hlauhawmah ngaiin, kan taksaah a thakna signak hi a thawn chhuak ta thin a ni. Sava te erawh chuan hetiang hi an nei ve lo a, chuvangin thak hi an hre ve lo a ni. He a thak tih kan hriatna hian endorphins leh dopamine kan kawchhungah a tichhuak thin a ni.
Ed Currie chuan Carolina Reaper angin Pepper X hi chu midangin an chin ve theih nan a phalrai tawh dawn lo niin a sawi a, Carolina Reaper atangin hlawkna pawh a beisei angin a nei pha lo a, chuvangin Pepper X hi chu a thawhrah atanga hlawkna a tel theih dan tur engkim a tihfel vek hnuah chauh a chi (seed) hi a tlangzarh dawn chauh niin a sawi.
Hmarcha thak ber Pepper X
