Sawrkar laipui Ministry of Education hnuaia Department of School Education & Literacy additional secretary Anandrao Patil kaihhruaiin August 13 & 14 chhung khan New Delhi-a Performance Assessment, Review and Analysis of Knowledge for Holistic Development (PARAKH) ah School Education Board chairperson-te, School Board, Samagra leh SCERT officials – Assam, Manipur, Meghalaya, Tripura, Mizoram, Nagaland leh Sikkim atanga koh khawmten workshop an nei.
Workshop-ah hian School Board-te intluktlan dan ‘Equivalence of Boards’ leh an kalphung inang lote chu engtin nge rualkhai zawka kalpui theih a nih ang tih ngaihtuahho a ni a. Mizoram atangin MBSE chairman JH Zoremthanga leh deputy secretary R Lalthlamuana an tel.
PARAKH CEO & head Prof. Indrani Bhaduri chuan hmun hran hrana School Board-te chuan an chenna hmun azira an danglam bikna pawlh dal si loa tehfung khat hmanga an kal theih dan tur chu an ngaihtuah ber tur a ni tih a sawi a. School Board-te nen thawhhona tha chuan tualchhung atangin ram pum huapah hlawhtlinna tha zawk a thlen ngei a ring tih a sawi a ni.
School Board-te nen sawihonaah hian naupang thiamna leh theihna tak (competency) phawk chhuak thei tur zawhna tha ‘question bank’ siam, Board chu State School Standards Authority anga hna thawk tir, khawl theihna hmanga examination kalphung siamthat ‘digitization’ leh school bansan tawh ‘out of school children’ te PARAKH nena tanghoa open school-a an let leh theihna tur a tel.
Hmarchhaka state School Board rualkhai zawka kal dan tur rel ho
